Premier Minister Evelyn Wever-Croes Premier Evelyn Wever-Croes y Crisis Team den Parlamento REUNION DI 8 ORA CONTESTANDO 97 PREGUNTA TOCANTE COVID
Premier Minister Evelyn Wever-Croes
Premier Evelyn Wever-Croes y Crisis Team den Parlamento
REUNION DI 8 ORA CONTESTANDO 97 PREGUNTA TOCANTE COVID
Diahuebs ultimo a tuma luga un reunion den Parlamento riba e tema Covid crisis. Premier Evelyn Wever-Croes a pidi un reunion den Parlamento pa asina e y Minister Dangui Oduber duna mas informacion na Parlamento tocante e Crisis di Covid y su consecuencianan. Desde e comienso di e crisis Premier Evelyn Wever-Croes y Minister Dangui Oduber, riba propio iniciativa, a bay Parlamento varios biaha pa duna informacion y ademas a manda Parlamento informacion por escrito, asina dunando transparencia den e peor crisis cu Aruba a conoce. E fraccionnan MEP, RED, POR y AVP tabata presente. Miembro independiente Daphne Lejuez tabata ausente.
E reunion a cuminsa cu informacion cu a wordo duna door di Premier Evelyn Wever-Croes tocante e maneho general di e crisis. Minister Dangui Oduber a elabora riba e maneho riba tereno di salubridad y a elabora riba e lekmento di informacion di covid.
Sra. Ronella Tjin-Ashoe-Croes (ATA) a elabora riba turismo y e retonan cu ta enfrentando. Turismo na juli tabata miho cu nos a premira y apesar cu augustus ta miho cu juli, e no ta mes bon cu a premira, debi na e cantidad halto di casonan na Aruba. Ta spera cu turismo lo lanta cabes bek despues.
Sr. Rino Hermans (Bureau RampenBestrijding Aruba) a elabora riba e structura di crisis y con e crisis team ta yega na nan decisionnan. Tambe a splica con e responsabilidad di Minister President, e opperbevelhebber, ta. Sr. Hermans a señala cu ta danki na e fondo di crisis cu e Gobierno aki a institui na 2018, por a reacciona lihe den e crisis aki.
Sra. Sharline Koolman (DVG) a elabora riba e strategia di test, di isolaciobn, di e cantidad di casonan, y e medidanan pa mitiga e plamamento. Sra. Koolman a indica cu nos tin suficiente capacidad pa atende cu e casonan awor, pero nos mester cuminsa baha e cantidad di casonan.
Sr. Gareth Tromp, epidemiologo, a comparti cifras di e cantidad di hendenan y especialmente e edad. Na principio di e di dos ola, e edad average tabata 27 aña, awor e ta 45 aña y esey ta motibo pa preocupacion. Esey ta e motibo principal cu Gobierno mester tuma paso pa stop e plamamento.
Parlamentarionan a hasi 97 pregunta, y tur a wordo contesta. Conclusion ta cu nos tin e profesionalnan pa atende cu e crisis, nos tin e cantidad di test, nos tin ekipo, nos tin suficiente remedi. Loke nos mester influencia awor ta e comprotacion di comunidad, pa evita cu e virus ta sigui plama. E reunion a dura 8 ora y tabata un reunion di nivel y hopi informativo. Gabinete Wever-Croes ta demostra transparencia y determinacion pa combati e crisis aki.