Minister Glenbert Croes na e graduadonan di FS/SVT12 Kere den boso mes pasobra nos ta kere den boso
Minister Glenbert Croes na e graduadonan di FS/SVT12
Kere den boso mes pasobra nos ta kere den boso
Covid a bin cambia hopi cos. Pero e determinacion di e hobennan aki pa por a culmina e trayecto tabata e logro di mas grandi. Y tabata cu honor cu Minister Glenbert Croes a haci entrega di certificado di terminacion exitoso di e trayecto di Formacion Social.
Diferente y significativo di e ceremonia di e aña aki tabata, ademas di e distanciamento social, e hecho cu n’e momento cu ta haci entrega di certificado na e graduadonan di grupo 12, simultaneamente ta duna inicio oficial na grupo 13 cu 24 di augustus a re-inicia cu e trayecto.
Hobennan cu kier duna nan mes un di dos oportunidad. Y corectamente manera e mandatario a expresa: “bida ta consisti di cay, lanta y cay atrobe multiple biaha. E secreto ta lanta bek.” Cu e solo hecho cu awe e hobennan aki ta den e trayecto di Formacion Social ta un indicacion cu e hobennan aki kier y ta bay duna nan mes un di dos oportunidad pa get back on track e biaha aki, pa lucha pa nan mes, traha pa nan porvenir pa un miho mañan.
Den nomber di Gobierno di Aruba Minister Glenbert Croes a desea un y tur, tur clase di exito, tur clase di apoyo. “Mi ta felicita nos hobennan graduado di SVT 12 cu nan logro. Nan a pone pa nan mes un fundeshi solido pa un futuro nobo pa nan mes. Nan ta kere den mes y nos ta kere den nan. Hunto nos lo keda tene nan man pa guia nan rumbo e futuro nobo cu nan TUR tin derecho riba dje. Alabes mi kier desea hopi exito na e grupo nobo di hobennan di SVT 13”.
Aruba
9 september 2020
