Mas proyekto pa bibienda na Sapaté ta ranka sali

Mas proyekto pa bibienda na Sapaté ta ranka sali

 

Willemstad – Minister Jesus-Leito huntu ku Dus Ron Bouwbedrijf B.V. i Domeinbeheer a duna inisio na e prome fase di e proyekto pa konstrukshon di 21 bibienda den bario di Sapaté. E ‘groundbreaking a tuma lugá dia 10 di sèptèmber último. 

 

Durante e proyekto aki, lo konstruí 3 tipo di bibienda, kada un ku su modelo úniko. E fase aki di e proyekto to dura un total di 1 aña i mei i kasnan ta kore entre Nafl. 100.000 te ku Nafl. 225.000. Kada kas lo tin un tereno di entre 450m2 ku 550m2, ku e doño ta risibí den forma di erfpacht. 

 

Durante di e anochi, Minister Jesus-Leito a amplia riba su vishon i deseo pa kumpli ku e nesesidat di pueblo di Kòrsou pa bibienda. Pa loke ta e proyekto aki, Gobièrnu a sera un asina yama ‘Public Private Partnership’ (PPP) ku Dus Ron Bouwbedrijf B.V. pa konstrukshon di 500 kas total. Den e tipo di proyektonan aki, Gobièrnu ta sòru pa e tereno den forma di erfpacht, i Dusron ta sòru pa e infrastruktura i traha kasnan pagabel pa nos komunidat. Tur persona ku ta riba lista di espera di Domeinbeheer tambe ta bini na remarke pa e kasnan. Na momentu di aplikashon, por indiká esaki i ta risibí un trato preferensial. 

 

Esaki ta e promé proyekto di Dusron ku ta kuminsá den Sapaté, i despues lo sigui ku mas proyektonan similar pa yega na e total di 500 kas den diferente bario. E proyekto aki sigur lo duna un realse na e bario di Sapaté. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: