Prome Minister Evelyn Wever-Croes: PROME MINISTER TA GRADICI WOW ARUBA PA E NOMBRACION ‘IMPACT WOMAN’ DI LUNA DI SEPTEMBER

Prome Minister Evelyn Wever-Croes:

 

PROME MINISTER TA GRADICI WOW ARUBA PA E NOMBRACION ‘IMPACTFUL WOMAN’ DI LUNA DI SEPTEMBER

 

WOW Aruba, Women empOwering Women, ta un organisacion funda na aña 2017 pa muhenan hoben y profecional pa impacta e comunidad Arubano den diferente area. Un obhetivo di WOW Aruba ta tambe pa duna bek na comunidad di Aruba pa medio di obranan caritativo.

 

WOW Aruba, den e temporada dificil cu nos pais ta pasando aden desde maart di e aña aki na unda cu Covid-19 a dal nos pais duro, a reconoce esfuerso y maneho di Prome Minister Evelyn Wever-Croes. Recientemente WOW Aruba a nombra nos Prome Minister como ‘IMPACTFUL WOMAN’ pa luna di September 2020.

 

Prome Minister ta gracidi WOW Aruba pa e reconocemento hopi importante aki den temponan crucial manera esun cu nos pais ta pasando aden. Alabes, Prome Minister ta expersa cu tur loke e ta bin ta haciendo desde e prome dia di gobernacion di Gabinete Wever-Croes ta na bienestar di progreso di nos pais. Y awo mas cu nunca e ta determina pa saca Aruba for di e situacion doloroso cu Covid a ocaciona na nos pueblo. 

 

Pa lesa e entrevista completo di WOW Aruba cu Prome Minister, bishita nan pagina di Facebook WOW Aruba. 

 

 

---

ENTREVISTA DI IMPACTFUL WOMEN CU PROME MINISTER EVELYN WEVER-CROES

 

1. Ken ta Sra. Evelyn Wever-Croes na banda di e mundo di politica?

Wel prome cu politica mi tabata mama, wela, ruman, tanta, yiu, amiga manera cualkier otro persona, y asina mi lo ta despues di politica tambe. Mi ta un profesional den e area di ley y impuesto, y mi ta dedica mi tempo liber na sirbi mi comunidad. Aparte di esaki mi ta un persona cu un fe grandi. E 4 areanan aki ta crea e balance den mi bida: famia – trabou – servicio – fe.

Mi ta un persona cu ta stima mi isla, cu nunca no ta bira lomba pa niun reto, y semper cla pa enfrenta tur, dunando cara na Pueblo di Aruba. Mi ta un persona cu ta kere nos mester atende tur cos cu seriedad y hopi serenidad y semper keda focus riba e meta, si bo no a logra awe “regroup” y continua mañan, pero nunca Give Up.

 

2. Sra. Evelyn Wever-Croes tin hobby cu ta haci den tempo liber/priva?

E ultimo añanan aki no tabata tin mucho tempo liber, pero si mi tin tempo liber mi ta gusta lesa un bon buki, of landa. Canta tambe ta un di e cosnan cu mi ta gusta haci. 

 

3. Ki estudio Sra. Evelyn Wever-Croes a(ta) haci(haciendo) ?

Cu mi 22 aña, na aña 1989, mi a gradua como “Meester in het Fiscaal Recht” na RijksUniversiteit Leiden. Y na aña 2008 mi a logra e extra examennan cu a permiti mi huramenta como abogado.

 

4. Con Sra. Evelyn Wever Croes a drenta e mundo di Politica

Mi a lanta den un famia cerca di politica. Betico Croes tabata mi omo y padrino.Mi tata, Hendrik Croes, tabata vakminister algun biaha pa Antiyas y Aruba, y mi tin mas famia cu tabata y ta den politica. Pero ami mes a bisa cu mi no kier drenta politica. Mi kier a studia, traha, haya yiu y dedica mi na famia, cual mi a haci tambe. Te 12 aña pasa ora mi a wordo acerca door di ex lider di MEP Nel Oduber pa drenta den politica. Na prome mi a nenga rotundamente y constantemente, pero despues di 6 luna nengando mi a realisa cu mi no tabata sinti mi bon cu mi mes. Semper mi tabata critico di tur gobierno, y awor mi ta haya e oportunidad pa drenta politica y duna mi contribucion, y mi a realisa cu mi no por core pa e reto, y na mei 2009 mi a duna mi ‘SI’ na politica. Mi casa y mi yiunan tabata un sosten grandi pa mi den e paso aki.

 

5. Con Sra. Evelyn Wever-Croes ta balancea bida familiar y ta e Prome Minister di Aruba

E no ta fasil, e trabou di Prome Minister ta exigi hopi tempo, energia y atencion, y lamentablemente hopi sacrificio di tempo cu mi famia, pero danki na mi casa Kenneth cu semper ta apoya mi, y agradecido na mi yiunan pa tur sosten, mi ta logra e balance y ta logra ‘quality time’ cu mi famia. E sacrificio cu mi casa, mi yiunan, mi mayornan y mi ruman ta haci, ta hopi grandi si, y mi ta spera cu Dios duna mi bida y salud pa mi por recobra e tempo aki cu nan bek na un forma of otro, despues cu mi sali di politica.

 

6. Sra. Evelyn Wever-Croes tin otro reconocimiento/logronan na su nomber? Y den kico esakinan ta?

Mi a haya reconocementonan den mi carera como fiscalista, pa mi trabou como politico femenino y pa e trabou cu mi ta haci den comunidad. Mi no ta haci e trabou pa haya reconocemento si.

 

7. Sra Evelyn Wever-Croes ta involve cu instancianan caricativo?

Mi ta miembro di Quota International of Aruba pa 23 aña, maske ultimo tempo mi no ta hopi activo, debi na e intensidad di e trabou como Prome Minister. Pero ora por, mi ta participa.

 

8. Sra. Evelyn Wever-Croes tin un mensahe pa e hende muhenan (Hoben/ Young professional) di Aruba?

Hende muhenan por hopi mas di loke algun di nos ta kere cu nos por. Nos por tur loke nos propone nos mes, pasobra nos ta trece otro caracteristicanan na mesa. No permiti ningun hende pone bo sinti cu bo no por.

Fiha bo meta den bida, y bay p’e. No laga nada desvia bo di dje.

Y nos mester di mas hende muhe den politica, pa trece e balance den decisionnan ehecutivo, cu ta tene miho cuenta cu e necesidadnan di nos muchanan, especialmente nos muchanan muhe, y cu e necesidad di nos hendenan muhe. E no ta facil, pero nada den bida ta facil.