Trabou Pa Kòrsou a drenta arena polítiko

Trabou Pa Kòrsou a drenta arena polítiko

Ayera  atardi Trabou pa Kòrsou (TPK) di forma ofisial a anunsiá nan entrada den e arena polítiko di nos pais.  Durante e rueda di prensa TPK a lansa Rennox Calmes  komo e lider polítiko pa bai guia e grupo pa bira un partido ofisial i partisipá na elekshon di  19 mart 2021. Calmes a sali i duna informashon riba su eskoho pa TPK. Calmes: “Pueblo a kansa di mesun karanan i polítika tradishonal”. Awel ata e kara nobo nan. Despues di a kibra sosten ku e koalishon aktual, Calmes a uza su tempu pa pensa i determiná kiko e ta bai hasi ku su karera polítiko.  Hopi a mira Calmes ta “struggle” ku e manera tradishonal  di polítika. Pero sigun Calmes a indiká ku e respaldo risibí dor di pueblo, despues di su último rueda di prensa i tambe e aserkamentu di TPK a tradusí e chispa polítiko den dje pa un vlam grandi pa awor mas ku nunka bai sigui bringa pe pueblo den polítika.  TPK ta “fit” ku e pensamentunan di Calmes loke a hasi e union sin problema.  TPK ta karga e ideologia sosial demókrata i tin Edukashon i Ekonomia komo su puntonan di lans’é.

Huntu ku Calmes tambe tabata presente 15 kandidato ku tambe lo ta riba lista pe elekshon benidero. Pa motibunan di COVID-19 no por a akapará e otro kandidatonan den e sala. E grupo aki a sigui e presentashon via un sistema digital Zoom. Despues di a presentá e vishon, mishon i pilarnan di TPK, kandidatonan Sr. Eduard  Reineta, Sra. Lianne Pauletta  i Sr. Renny Leito a presentá un ñapa di TPK su aserkamentu i plannan pa ku Edukashon i Ekonomia.  

Maske pueblo a pèrdè konfiansa den polítika i hopi hende no kier mete mas ku polítika tradishonal, TPK a mustra ku nan tin hende kualifiká i desididu pa ban hasi e kambio. Calmes:”Nos kandidatonan ta bini di tur huki ku bientu ta supla”.  TPK tin hende ku a pèrdè trabou, ku ta trahando, negoshante i tambe penshonado. Tur ku òf sin titulo. Loke ta konta pa TPK ta nan determinashon pa nos ban drecha Kòrsou. Pa TPK ta basta ku e mito di :“Nos mes no por” i  “Ta nan so por”.  TPK te alternativa polítiko ku ta bai kibra ke tradishon aki! Pronto TPK ta bai duna mas informashon riba su plannan.

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: