Calmes:”Sin aprobashon di Parlamento no por bende NV’s mas!”

Calmes:”Sin aprobashon di Parlamento no por bende NV’s mas!”

Willemstad- Parlamentario Calmes ta kontentu ku a sera un otro buraku den Lei di kompatibilidat ku tabata hasi posibel pa Gobièrnu bende  kompania di pueblo sin aprobashon ofisialmente Parlamento. “Un otro logro pa pueblo di Kòrsou” tabata promé reakshon di Calmes.

E lei importante aki no tabata akapará protekshon ni tabata sòru pe transparensha nesesario ora Gobièrnu disidí di bende un NV di Gobièrnu. Partikularmente benta di akshonnan di un kompania den kual Gobièrnu tin akshon òf benta di su propio NV no tabata regla den Lei di kompatibilidat. Calmes ku ya a bini ta trahando riba e proseso aki pa trese kambio a presentá su proposishon di kambio awe den reunion riba e Lei menshoná. E proposishon a risibí su sosten i a wòrdu aprobá.

“Awó pueblo ta sa ken ke bende su propiedatnan”; sigun Calmes. Durante e último tres añanan Calmes a eksperensha kon ta trata e representantenan di pueblo ora ta bai bende propiedat di pueblo. Ainda UTS, ISLA i PSB ta bibu den nos memoria. Aktualmente Gobièrnu tin akshon òf ta doño di diferente entidat. Mester sòru pa ora di benta esaki bai transparente. For di awor benta di esakinan no ta posibel sin kumpli ku e Lei aki ku ta eksigí un aprobashon di Parlamento. E kambio den e Lei ta stipulá bon kla awor ku e Minister di Finansa i e Minister ku kier bende un NV òf akshonnan di un NV mester risibí aprobashon di Parlamento. Hasiendo e kambionan aki ta pone ku Gobièrnu no por bende i despues djes bin informá Parlamento mas.