Reakshon riba kobertura resien di ENNIA den medionan di komunikashon

Reakshon riba kobertura resien di ENNIA den medionan di komunikashon

Willemstad/Philipsburg – Komo reakshon riba sierto kobertura resien den medionan di
komunikashon, Centrale Bank van Curaçao en Sint Maarten (CBCS) ke duna e siguiente informashon.
Na komienso di yüli di 2018, riba petishon di CBCS, Korte di Promé Instansia di Kòrsou a dekretá
un areglo di emergensia relashoná ku, entre otro, ENNIA Caribe Leven N.V., ENNIA Caribe Schade
N.V. i ENNIA Caribe Zorg N.V. (ENNIA). Sr. Ansary a apelá e desishon akí via diferente kaso den
korte i a pèrdè tur e kasonan akí. US Bankruptcy Court na New York tambe a rekonosé e areglo di
emergensia i a rechasá Sr. Ansary su defensa kontra esaki. Pues, legitimidat di e areglo di emergensia
ta fuera di duda.
A dekretá e areglo di emergensia kontra dos otro empresa tambe: ENNIA Caribe Holding N.V. i
EC Investment N.V. E dos institutonan akí no tabata bou di supervishon di Banko Sentral i, debí na
esei, ta te despues ku e areglo di emergensia a drenta na vigor, por a haña un bista di magnitut di e
problemanan.
Despues di un investigashon ekstenso, a determiná ku ENNIA a sufri daño na balor di por lo ménos
NAf 700 mion komo resultado di mal maneho di esnan ku poder di desishon (entre otro tim di
maneho) i akshonistanan, kendenan deliberadamente a hasi uso di struktura korporativo notransparente i entidatnan ku no ta bou di supervishon di Banko Sentral. Awor, ENNIA ta eksigiendo
kompensashon di e daño akí via un proseso di responsabilidat den korte
(‘aansprakelijkheidsprocedure’) entamá mediante un petishon entregá dia 11 di òktober 2019. Dia 28
di sèptèmber, 2020, kasi un aña despues, Sr. Ansary a reakshoná, den e proseso akí den korte, riba e
evidensia i e basenan pa e alegashonnan ku a keda presentá den e petishon.
CBCS semper ta dispuesto pa partisipá den negosiashon serio pa yega na un akuerdo. Den e último
añanan, a deliberá ampliamente ku Sr. Ansary na diferente okashon (tantu promé komo despues ku e
areglo di emergensia a drenta na vigor). Sin embargo, te asina leu, Sr. Ansary no a hasi niun intento pa
yega na un proposishon konkreto pa un akuerdo, apesar di a dun’e diferente oportunidat al respekto.
Si Sr. Ansary bin ku un proposishon konkreto i realístiko pa yega na un akuerdo pa kompensashon di
e daño ku ENNIA a sufri, CBCS ta kla pa papia.
Banda di esei, CBCS ta sigui traha duru, huntu ku ENNIA su tim di maneho, pa kumpli ku e mandato
legal pa restrukturá ENNIA.
Willemstad, 30 di sèptèmber di 2020
CENTRALE BANK VAN CURAÇAO EN SINT MAARTEN

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: