Gobièrnu ta felisitá hinter komunidat ku 10 aña pais outónomo den Reino.

Gobièrnu ta felisitá hinter komunidat ku 10 aña pais outónomo den Reino.

Geplaatst op 09 October 2020 dor di Ministerio Asuntunan General i Promé Minister

WILLEMSTAD – Riba 10-10-20 ta 10 aña pasá ku Kòrsou ofisialmente a bira pais outónomo den Reino. Hopi a tuma lugá den e último 10 añanan i nos a yega un momentu krusial komo pais. P’esei awor ta e momentu pa reflekshon pa nos pueblo. Ban reflekshoná huntu riba desaroyo komo nashon den e delaster periodo aki, den forma di e siguiente lema: “Mi Pais, Mi Kompromiso”.

Gobièrnu di Kòrsou a tene kuenta ku e medidanan di prevenshon di COVID-19 i p’esei ta presentá un programa di forma virtual pa para ketu na reflekshon di e delaster 10 aña. Durante di e programashon na e diferente plantanan di televishon lokal, lo bai pasa vários aktividat kultural, aktividatnan kaminda ta duna honor, i rekonosementu na nos mes hendenan i personahenan prominente di nos komunidat ku ta duna nan punto di bista riba e tópiko. E moderadó di e programashon Daniel Corsen huntu ku nos Minister Presidente / Minister enkargá ku kultura Sr. Eugene Rhuggenaath, lo forma parti integral di e reflekshon. Entre otro nan lo para ketu na e diferente áreanan di kultura kaminda mester pone mas énfasis riba djé. Esaki no ta enserá solamente ekspreshon, pero un desaroyo di identidat di nos nashon pa protehá, kultivá i konektá pa asina por kosechápi pues salbaguardiá tantu nos herensia kultural komo tambe mustra ku nos kultura ta forma parti integral di e desaroyo duradero di nos pueblo.

Lo bai tin partisipashon di: Gilberto Bakhuis, Sueena Francisco, Charles do Rego, Richard Riedel, Kurt Schoop, Jeanette Bonet, Valdemar Marcha, Furgell Wijngaarde, Gwen Leuteria i Giomy Klepper. Aktividatnan ku ademas ta forma parti di e programashon ta un kompilashon kultural di e Siman di Kultura komo antesala pa 10 di òktober 2020, instalashon di Konseho Kultural, Entrega di Premio kulinario Charlwin ‘Broertje’ Marshall, Honor di nos mes baluarte Rutilio (Rudy) Rooi i atenshon na “Mi Pais, Mi Kompromiso” for di punto di bista di suidadanonan den komunidat.

Den e programashon tur personahe lo para ketu na nan kontribushon i kompromiso pa ku Kòrsou pa e próksimo temporada. Esaki ta un parti kaminda lo elaborá riba e preguntanan manera kiko kultura ta nifiká p’ami, di ki forma ami ta biba mi kultura, i kiko kultura ta nifiká pa mi pais? Alabes kon kada un di e personahenan akí a eksperensiá e último 10 añanan.

Gobièrnu ta pidi Pueblo pa ban komprometé nos mes pa huntu komo nashon traha na un futuro briyante, ku ta kontribuí na bienestar di un-i-tur. Ban duna un empuhe na konstrukshon di nos pais pa krea mas oportunidat pa kada un di nos. Di e forma aki por yega na desaroyo duradero kaminda kada un di nos ta karga nos responsabilidat i komprometé nos mes ku nos nashon.

Ministerio konserní 

  • Enseñansa, Siensia, Kultura & Deporte
  • Asuntunan General i Promé Minister

This site uses Akismet to reduce spam. Learn how your comment data is processed.

error: Content is protected !!
%d bloggers like this: