Komunikado di kuerpo polisial Korsou: Kaso di hinkamentu ku morto.

KOMUNIKADO DI PRENSA 399 / 2020
11 òktober 2020
Kaso di hinkamentu ku morto.
Departamentu di Komunikashon i Prevenshon
KUERPO POLISIAL KÒRSOU
SIRBI I PROTEHÁ

Djadumingu 11 di òktober 2020 alrededor di 03.45’or, Sentral di Polis a risibí informashon di un kaso di hinkamentu serio ku a tuma lugá na un kas den Kura Piedra.
Na yegada di e unidat, nan a bin topa un hòmber drumi parsialmente den un krenwá i no tabata duna señal di bida.
Ambulans ku a yega na e sitio, no por a hasi nada mas pa e víktima.
Dòkter di polis ku tambe a presentá, a konstatá morto di e hòmber Sheriff Ballentine, nase na Jamaica dia promé di òktober 1978.
For di investigashon preliminar a sali na kla ku un hòmber a yega na e kas aki unda e víktima tabata biba ku un dama.
Despues di un pleitu i bringamentu entre e agresor i e víktima, e agresor a hinka e víktima ku un opheto skèrpi na vários parti ariba di su kurpa.
A konsekuensia di esaki, e víktima a fayesé na e sitio.
Polis ta en buska di e sospechoso, ku despues di su akto a bati retirada.
Riba òrdu di fiskal di Ministerio Públiko a konfiská e kurpa sin bida pa mas investigashon.