Prome Minister Evelyn Wever-Croes: RE-APERTURA DI LOKAALNAN DI CACIQUE MACUARIMA 

Prome Minister Evelyn Wever-Croes:

 

RE-APERTURA DI LOKAALNAN DI CACIQUE MACUARIMA 

Diabierna mainta, Casique Macuarima School a haci re-apertura di e lokaalnan cu a kima dia 13 di januari ultimo. Manera ta conoci, e aña a habri cu e lamentabel noticia cu e scol aki a bira victima di vandalismo na unda cu varios klas a wordo kima. E team completo di Scol Basico Cacique Macuarima, mayornnan, docentenan y alumnonan a traha duro pa logra cosnan grandi pa nan scol. Y awe nan a demostra di ta fuerte un biaha mas y a logra cu awe e re-apertura aki a tuma luga y alumnonan di Casique Macuarima School por bay bek na nan klasnan. 

 

Pa e ocacion bunita aki, Meneer Richard a duna un bon bini na tur invitadonan presente den presencia di tur alumno y docentenan. E ceremonia a cuminsa cu Himno di Aruba y Himno di e scol. Pastor Jairo Maduro a haci un oracion y a bendiciona e lokalnan nobo. 

Prome Minister Evelyn Wever-Croes a duna di conoce cu pa Gobierno di Aruba un di e prioridadnan ta pa tur edificio escolar ta den bon estado ya cu esaki ta na unda nos hobennan ta wordo forma. Ademas pa e docentenan e edificionan aki ta manera nan di dos cas y pa e motibo aki e edificio mester ta uno bunita y agradabel pa nan por traha. Prome Minister ta sumamente satisfecho cu e resultado di e trabounan duro cu a bin ta eherciendo riba e lokaalnan na Cacique Macuarima. Awe e alumnonan tin e oportunidad di studia y e docentenan por traha den lokaalnan nobo y bunita. 

Premier Evelyn Wever-Croes a tuma e oportunidad tambe pa felicita tur e docentenan ,cabesante y ex cabesantenan pa cu e di 50 aniversario di Cacique Macuarima y ta gradici nan pa e gran trabou cu nan a bin ta eherciendo durante e 50 añanan aki cu formacion di nos hobennan. 

“Den bida hopi biaha hende no ta compronde pakiko cierto cosnan ta pasa, pero cu tempo ta realisa kico e proposito di e sucedido tawata. Den e caso di Cacique Macuarima hopi cosnan positivo a sali di e sucedido na januari. E sucedido aki a trece hopi cooperacion di mayornan pero tambe di comunidad di Aruba cu a sa di saca man mesora pa por yuda e scol drecha tur e dañonan haci. 

Pues ban recorda e cosnan bunita y haci di e aña aki uno exitoso y cu Dios bendiciona cada un di boso nan”, Premier Evelyn Wever-Croes a termina bisando.

Presente y a hiba palabra na e ocacion tawata Parlamentario Edgard Vrolijk, Minister di Enseñansa Rudy Lampe, Sra Baly, Directora di SKOA, Cabesante di scol, Rachelle Croes-Caster