Minister i UTS no a kumpli ku promesa hasi durante benta di UTS na Liberty Global, ku lo pone Internet na skolnan i universidat

Willemstad, 22 di òktober 2020

 

Presidente di Parlamento di Kòrsou

Señora A. Pauletta

Wilhelminaplein # 4

PRESENTE

 

Señora Pauletta,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di VVRP, señora Zita Jesus-Leito.

 

Danki pa e koperashon.

 

Atentamente,

 

Gilbert Doran

Parlamentario pa

frakshon di MFK

 

Minister di VVRP

Señora Zita Jesus-Leito
PRESENTE

Kòrsou, 11 di òktober 2020

Tópiko: Minister i UTS no a kumpli ku promesa hasi durante benta di UTS na Liberty Global, ku lo pone Internet na skolnan i universidat 

 

Minister Jesus-Leito,

 

Ta fresku den nos memoria ainda, dia ku Sra. Minister a presentá den un reunion di Komishon Sentral ku tabata tin komo tópiko: Benta di UTS, vários tabata e kondishonnan ku a keda poné di parti di Sra. Minister ku e kumpradónan UTS mester a bai kumpli kuné. 

 

Un dje kondishonnan ku a hala atenshon di tur hende e durante di e reunion, tabata esun kaminda Sra. Minister a bisa den e akuerdo di benta tin e siguiente kondishon i nos ta sita;

 

“A pidi pa tur skol na Kòrsou i universidatnan haña e oportunidat pa haña Internèt pòrnada, pa asina ei nos por keda al tanto i nos hóbennan tambe por keda al tanto di e último desaroyonan i ku lo no tin barera pa nan por partisipá den esaki”

 

Sra. Minister ta trata aki di un gesto noble ku lo mester a tuma lugá i ku ta parti di un palabrashon konkreto ku a keda hasi komo parti di e akuerdo ku a sera entre Liberty Global ku kumpra UTS i gobiernu di Kòrsou komo representante di akshonista.

 

Sinembargo, te ku e dia di awe, lamentablemente nos mester tuma nota ku te ainda no a kumpli ku e kondishonnan spesífiko aki hasi durante reunion di Parlamento.

 

Ta di lamentá ku den sala di reunion di Parlamento i dilanti representantenan di Pueblo di Kòrsou un Minister ku mester konta ku konfiansa di komunidat, ta hasi un promesa mas ku un aña pasa i te ainda no a kumpli ku esaki. Banda di e kondishon aki, te ku e dia di awe no tin un klaridat pa kuantu plaka Gobièrnu di Kòrsou a bai di akuerdo pa a bende UTS ku Liberty Global. 

 

Sra. Minister Jesus Leito, un pueblo no gusta ku su mandatarionan ta hasi promesa i manera nos grandinan ta bisa mustra un kuchara di suku i te hasta intentá na pasa esaki na boka dje pueblo, pa despues skonde esaki i no kumpli. Pueblo di Kòrsou ta sumamente desapuntá den akshonnan di Gabinete Rhuggenaath ku  tin komo un kustumber pa hende propiedatnan dje pueblo aki na baka flaku i pa kolmo ta hasi promesa sin ta kumpli.

 

Hasiendo uso di artíkulo 96 di nos Reglamentu di Órden, nos kier a hasi e siguiente preguntanan;

 

1. Sra. Minister ta kòrda kon den reunion di Parlamento a bisa ku:  “A pidi pa tur skol na Kòrsou i universidatnan haña e oportunidat pa haña Internèt pòrnada, pa asina ei nos por keda al tanto i nos hóbennan tambe por keda al tanto di e último desaroyonan i ku no tin barera pa nan por partisipá den esaki”, si e kontesta ta afirmativo kon a para ku esaki?

 

1. Kon a para ku e petishon aki, e tabata hinká den e akuerdo di benta o e tabata solamente un petishon ku boka di parti di Sra. Minister?

 

1. Si e tabata hinká den e akuerdo di benta, pa ki dia Universidatnan i skolnan na Kòrsou lo por kuminsá gosa di servisio di Internet grátis aki?

 

1. Si e petishon no tabata hinka den e akuerdo di benta pero mas bien tabata un deseo di Sra. Minister, kon lo por regla pa UTS/FLOW kumpli ku e deseo aki tòg?

 

1. Banda di esaki, último dianan ku a pasa pueblo di Kòrsou a bin ta ekspresá masha hopi keho riba e servisio i e kalidat di Internèt na Kòrsou, kua ta e akshonnan konkreto ku Minister a tuma pa resolvé e problema aki?

 

Sra. Minister, promesa na un pueblo ta algu sagrado i no por primintí nos hóben studiantenan algu i no kumpli ku esaki. Ku si tin problema, no ta kita nada for di Minister pa pidi despensa i informá ku awor ku a bende UTS i e ta un kompania priva, ku no por hasi nada mas i ku no por kumpli ku e promesa aki mas.

 

Sperando di por haña un kontesta den e tempu ku nos Reglamentu di Orden ta preskribí, nos ta keda

 

Atentamente

 

Gilbert Doran

Parlamentario pa 

frakshon di MFK