Reforma i Gastunan di salubridat

Reforma i Gastunan di salubridat

Geplaatst op 23 October 2020 dor di Ministerio Salubridat Públiko, Medio Ambiente i Naturalesa

Willemstad- Den e último dianan hopi informashon eróneo a wòrdu transmití den komunidat i na prensa riba asuntu di remedi. A surgi basta opservashon, análisis i kritiká. Tur basa riba informashon inkorekto.

Gobièrnu for di den oktober 2018 huntu ku CFT a tuma desishonnan pa reforma e sektor di Salubridat Públiko pa asina por logra baha gastu den e sektor. E introdukshon di e hospital nobo CMC a trese kuné mas gastu pa e servisio médiko ku hospital ta duna  dor ku ta trata di un hospital altamente sofistiká i moderno ku mihó servisio médiko ku aparatonan di último desaroyo tékniko, kompará ku e hospital Bieu ku ta SEHOS. Pa hasi e investigashonnan na un manera profeshonal Gobièrnu a instituí un Taskforce ku e tarea pa presentá informenan den gastu di e sektor. Naturalmente komo  Minister di Salubridat mi ta di akuerdo i ta sostene tur e esfuersonan pa trese e reformanan nesesario pa asina evitá ku gastunan mas haltu lo trese kuné ku Gobièrnu tin ku konsiderá subimentu di prima.

E taskforce a presentá 4 aria kaminda e reforma por haña kurpa i pia:

  1. remunerashon di spesialistanan
  2. servisio di laboratorionan
  3. tratamentu di pashèntnan di Kòrsou den eksterior
  4. suministrashon di remedi.

Awor ta asina ku den e asuntu di remedi a bini algun desaroyo ku por brua komunidat den komprondé kiko ta e situashon real.  Anto riba esei nos lo kier duna un splikashon.

Gobièrnu su punto di maneho ta ku pa baha gastu di remedi, meskos ku den otro paisnan manera Hulanda, Merka i Aruba, mester kambia mas tantu remedi posibel pa remedinan generiko (e asina yama “substitutie beleid”). Lokual esaki ta nifiká ta ku ta buta kambia mas tantu remedi “spesialite”, ku ta hopi karu, i buta na lugá di e eseinan remedinan “genériko” ku ta muchu mas barata (pasobra no tin derechi di patento riba nan mas) pero di mes kalidat. E Taskforce for di anja pasa a deliberá ku tur aktornan relevante den e sektor di kuido na vários okashon riba e reformanan nesesario. Tambe Gobiernu, huntu ku SVB a sera un convenant na komienso di  e anja aki ku e asosiashon di botikarionan i donjonan di botika pa implementa e maneho di sustishon di remedi manera indiká ariba.. E reformanan den e sektor di medisinanan lo tin ku produsí un bahamentu di gastunan ku 41 mion, loke ta un montante supstansial pa asina alkansa e finansiamentu di e gastunan di e hospital nobo ku tur hende ta gosa di dje.

Awor dor di un fayo i mal interpretashon dor di e inspektor di medisina ad interim, e a disidí di manda un karta pa Minister di salubridat i otronan den e sektor ku innesesariamente a kousa un konsternashon serka basta hende. Mi ta pidi mi diskulpa pa esei i mi a tuma e situashon aki hopi na serio i a tuma e desishon di korigí e informashonnan eroneo i buta esnan responsabel karga ku e konsekuensianan.

Naturalmente komo minister di Salubridat lo mi sigui hasi tur esfuerso pa nos por trese e reformanan nesesario den e sektor di salubridat di tal manera ku e siudadano no tin molèster di subida di ningun prima, ni tampoko di skarsedat di remedi of kalidat di servisio.

 

Pa  ‘download’ e presentashon kompletu riba e tópiko di ‘Reforma i Gastunan di Salubridat’ klek aki: https://bit.ly/34m6fXu

This site uses Akismet to reduce spam. Learn how your comment data is processed.

error: Content is protected !!
%d bloggers like this: