Avansenan di Meteo dies aña despues di e pasashi di Tomás.

 

Avansenan di Meteo dies aña despues di e pasashi di Tomás.
Dia promé di novèmber ta hasi dies aña ku Tormenta Tropikal Tomás a pasa nort di
Kòrsou.
Lamentablemente un boluntario, Sr. Robert Willems, a pèrdè su bida trágikamente
durante di un akshon di reskate di personanan ku mester a ser reskatá for di un edifisio
inundá.
Tormenta Tropikal Tomás a pasa djaluna dia 1 di novèmber 2010 durante di
traimèrdia na un distansia di mas o ménos 120 kilometer nort di Kòrsou i tabata move
den direkshon wèst. Tomás tabata debilitando durante di oranan di e atardi ei. Meteo a
emití un advisory pa informá entre otro tokante di e kantidat di áwaseru (40-80 mm)
ku tabata ser antisipá e anochi ei. Meteo a konsehá e tim di kalamidat pa keda den
estado di alerta durante di oranan di anochi. Alrededor di 8’or di anochi, na momentu
ku sentro di Tomás tabata na un distansia di 180 kilometer nortwèst di Kòrsou, Meteo
a emití un atvertensia pa mal tempu, pa motibu di e áwaseru torensial ku tabata
kayendo sin stòp i e hopi welek ku bos ku tambe tabatin. Opservadónan di stashonnan
boluntario a registrá dia 2 di novèmber entre di 250 i 300 mm di áwaseru den e área
sentral di Kòrsou. Gran parti di e área aki a inundá pa e motibu aki.
Despues di e akontesimentunan aki, Meteo al laga hasi investigashon ku e meta pa
duna rekomendashon ku por prevení esaki den futuro. I durante di e añanan ku a pasa,
gran mayoria di e rekomendashonnan riba tereno di infrastruktura, proseso i
komunikashon a wòrdu implementá na Meteo. Riba tereno di infrastruktura, USONA
a finansiá un estudio di inundashon riba áreanan spesífiko na Kòrsou, kompra i
instalashon di un kantidat di stashon outomátiko na vários parti di Kòrsou. Esaki
tabata pa por registrá kantidat di áwaseru den tempu real i asina duna Meteo
informashon mes ora na unda tin inundashon ta tumando lugá. Basá riba esaki, Meteo
por duna alerta mas dirigí. Tambe ku e kompra di un radar di último teknologia Dual
Pole Doppler, Meteo ta ekipá pa monitoreá wer den un forma mas avansá i por
komuniká mes ora riba esaki.
Lokual ta e proseso di saka alerta, Meteo a desaroyá, huntu ku Organisashon
Meteorológiko Mundial, e sistema di alerta ku ta kontené tambe menshon di e
impakto i kolónan di severidat. E sistema di traha boletin pa alerta ku Meteo a
desaroyá, ta redusí produkshon di esaki di 30 minüt na 3 minüt i na tres diferente
idioma. Adishonalmente Meteo a introdusí e sistema di kalidat pa asina garantisá
mantenshon di kalidat di su trabou.
Meteo a diseñá su propio studio di grabashon, pa asina por komuniká mas fásil i
efisiente ku públiko, tambe via di retnan sosial manera:
• Facebook
• Youtube
• WhatsApp (+59995601089)
• Curacao Weather app
Tur esaki ta pa por alkansá i interkambiá direktamente ku komunidat di Kòrsou.
Pa resumí, reflehando riba Tormenta Tropikal Tomás i su impakto, Servisio
Meteorológiko a implementá gran mayoria di e rekomendashonnan. Hopi ta esnan ku
por mira e produkto- i servisionan ku Meteo ta brinda aktualmente.
Siguiendo desaroyonan internashonal ku eventonan di wer ekstremo lo sigui oumentá,
diferente tratadonan ta eksihí un oumento di kantidat di produkto i servisionan di un
Servisio Meteorológiko, pa asina redusí e vulnerabilidat i alsa resiliensia. Den e
kuadro aki Meteo lo bai hasi uso di mas teknologia di inteligensia artifisial pa
oumentá efisiensia di produktonan.
Meteo ta sigui mehorá su servisionan pa asina salvaguardá bida i propiedat di pueblo
di Kòrsou. Mishon di Servisio Meteorológiko ta: “Vigilando wer 24/7 pa protehá
bida i propiedat.” Meteo ta sigui enkurashá tur hende interesá pa registrá pa
risibí nos boletinnan spesial via di nos number di WhatsApp (+59995601089).

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: