Ta hasi hopi doló di a mira awe kon 11 Parlamentario ta pone opinion di sindikatonan un banda pa trata un lei ku sindikatonan a indiká ku no a kana korekto

Ta hasi hopi doló di a mira awe kon 11 Parlamentario ta pone opinion di sindikatonan un banda pa trata un lei ku sindikatonan a indiká ku no a kana korekto

 

Miéntras ku gabinete Rhuggenaath ta práktika un maneho di “Forti Habri” pa skucha pueblo i organisashonnan den komunidat, awe Parlamentarionan ku ta sostené gabinete Rhuggenaath ta pone preokupashonnan di sindikatonan un banda pa trata un lei ku sindikatonan ta ilustrá ku no a kana segun regla i segun leinan eksistente.

 

Pa medio di un proposishon di órden, suskrito a hasi un apelashon riba presidente di Parlamento pa no trata e proyekto di lei “Landsverordening Inkorting Arbeidsvoorwaarden 2020”. Pero pa promé ku e lei wòrdu trata pa Parlamento buska informashon riba e reklamonan ku e sindikalistanan a trese awe mainta den Parlamento riba e forma ku a yega na e lei aki i sin a práktika diferente regla ku segun nan mester a ser apliká.

 

Manera ya ta un kustumber e mayoria di 11 a vota kontra di e proposishon di órden aki i a skohe pa tratamentu di e lei kontinuá, pa asina gabinete Rhuggenaath por kòrta riba kondishonnan di trabou di trahadónan. Esaki sin duna balor na opinion di e sindikatonan ku ta representá e klase trahadó ku ta sindikatonan.

 

Ainda ta fresku den nos memoria kon pueblo di forma masal a bai manifestá na Forti debí ku gabinete Rhuggenaath no tin oido pa loke siudadanonan ta pasa aden. Ta di lamentá ku nos Parlamentarionan ku ta sostené gobiernu tampoko no ta duna oido na representantenan di trahadónan.

 

Den e lei di CGOA ta deskribí kon mester kana e proseso pa yega na e lei aki, artíkulo 10 insiso 6 ta papia di “uitzondering”, pero Minister no a kumpli ku regla i lei promé ku e yega na e desishon pa manda e lei aki pa e ser trata den Parlamento.

 

Den e reunion di awe mainta ku sindikatonan, nan a indiká ku mester tabatin un akuerdo entre di nan i Raad van Minister i tambe ku Raad van Advies mester wòrdu skucha. Tambe e sindikatonan a indiká ku nan no por haña nan mes den e konseho di SER.

 

Kòrta den benefisiosonan di e ámtenar na e momentu nan aki ta unu devastador. Ya kaba e ámtenar no por karga nada mas, debí ku pa basta aña tur ámtenar a keda mes un kaminda para i no tin un maneho pa formashon i tin hopi ámtenar ku gobièrnu mester paga nan primanan ku nan tin derechi riba dje i ku no a risibí e pagonan aki. Mayoria di trahadó tin komo 2 òf 3 fiansa, sea ta hipotek i/òf fiansa pa estudio di yunan den eksterior, meskos tin otronan ku tin un fiansa relashoná ku kompra di un outo. 

 

Frakshon di MFK a spera ku gabinete Rhuggenaath (lesa Minister Armin Konket) lo a sinta na mesa ku sindikatonan i asina yega na un akuerdo kaminda, Gobièrnu, Parlamento i Sindikato ta tuma e mihó desishon pa e klase trahadó.

 

Juniël R. Carolina

Miembro di parlamento pa MFK

This site uses Akismet to reduce spam. Learn how your comment data is processed.

%d bloggers like this: