Karta di Daisy Coffie na Kolegio Ehekutivo riba punto di agenda “Rapòrt investigashon integridat”

 

Na Kolegio Ehekutivo di Entidat Públiko di Boneiru

Parke Wilhelmina 1

Kralendijk Boneiru 

P r e s e n t e.

 

Boneiru, 15 di novèmber 2020.

 

Apresiabel Kolegio,

Refiriendo na e desaroyo di e reunion fechá 12 di novèmber 2020 ku e punto di agènda “ Rapòrt investigashon integridat”, kombiná ku un konferensia di prensa ku gezaghèber a tene riba e tema aki, suskrito ta sinti e nesesidat pa buska klaridat den henter e asuntu aki.

Na promé lugá mi ke pa e preguntanan ku mi a hasi durante e primera tanda di e reunion menshoná, ku no a ser kontestá ainda (marká ku hel den e dokumento athunto), ser konsiderá komo parti integral di e dokumento aki ku e petishon pa sea kontestá nan promé ku kontinuá ku e segundo tanda di e reunion òf kontestá nan den e promé reunion públiko ku lo keda tené despues ku Kolegio risibí e dokumento aki.

Pa loke ta trata e konferensia di prensa ku gezaghèber a tene, den kua Sr. Gezaghèber ta hasi menshon di e echo ku segun Sr. Gezaghèber miembronan di Konseho Insular lo a desviá for di kontenido di e rapòrt pa konsentrá riba prosedura i hasta rekurí na akusashonnan infundá lo siguiente:

  • Gustosamente mi ke sa na kua miembronan di Konseho Insular Gezaghèber ta referí den e konferensia, ya ku Sr. Gezaghèber su deklarashonnan tin un tono general dirigí riba Raad kompleto.
  • Kon Gezaghèber por papia di e echo ku segun e no a trata kontenido di e rapòrt, si ningun pregunta hasí riba e kontenido no a keda kontestá te ainda. I netamente na final di e promé tanda mi a indiká ku basá riba kontestanan riba mi preguntanan lo mi elaborá den segunda tanda. No a kontestá tur mi preguntanan ni nos no a yega na segunda tanda. Pues e konklushon di gezaghèber ta totalmente for di sla sigur pa loke ta toka frakshon Coffie.

Mirando e loke mi a deskribí ariba, ta hiba mi na trese adishonalmente e siguiente preguntanan.

  1. Kon ta hasi drenta den debate riba kontenido ora 4 di e 7 temanan -Bon Lab su investigashon ta kanando separá- a keda será ku un deklarashon vago di  “Geen(genoeg) onderbouwing“. Un deklarashon ku hasta un diputado a uza den su presentashon kreando e impreshon ku nada lo no a tuma lugá pa loke ta e 4 puntonan i ku lo ta kontra e prinsipio di integridat. Gezaghèber lo ta dispuesto awor si pa pone tur dokumentu relashoná ku e investigashon aki na disposishon di Raad sin ningun klase di sensura i/o restrikshon pa hasi un debate riba kontenido posibel?
  • A keda establesé ku un diputado, Sra. Den Heyer a persistí pa a bin un investigashon imparsial i independiente di henter e “ dosié di traspaso” i ku sobrá miembronan di Kolegio a rechasá. Ki konklushon diputado den Heyer a saka awor ku parti di e investigashon a keda konkluí ku “Geen(genoeg) onderbouwing”. E diputado ta konkluí ku ela haña rason?

Sr. Gezaghèber, segun mi humilde opinion tin mas ku sufisiente rason, pa e investigashon pa ku integridat den BHM i su yunan lo a bai mas profundo, i asina hasi un debate riba kontenido posibel. Mi ta menshoná, pero no limitativo.

  • “Onzakelijke contracten van aangetrokken consultants”, kaminda no por stipulá e relashon di e “opdracht”, e pago i e “prestatie” (resultado);
  • A uza BHM komo “work-around”;
  • A tuma lugá “hand-picked benoemingen”;
  • Konsentrashon di “ONV’s” den man di un diputado;
  • Envolvimentu di büró di diputado den e kompanianan;
  • Kopiamentu di modelonan ku otro paisnan a uza i apliká nan sin mas na Boneiru.

Temanan di diskushonnan relashoná ku entre otro e puntonan aki ku defakto a forma e esensia di e disputa entre e eks direktor interino i mui en espesial e mesun diputado di kua e rapòrt ta konsehá i rekomendá pa no konsentrá tur e outoridatnan den su man so. I ta p’esei mi a bisa ku a tapa e esensia di e problema “Eliminá BHM” i a konsentrá riba un tema ku no direktamente ta kai bou di BHM pero ku e eks direktor a bin topa riba su mesa. Ku a envolví e tema aki den e investigashon ta korekto i e konklushonnan ta papia palabra kla pa loke ta violashon di integridat. I ku mester tuma pasonan apropiá awor i pa evitá ripitishon den futuro ta opvio.

Sr. Gezaghèber, praktikando transparensia komo un di e prinsipionan di bon gobernashon, c.q. integridat, e siguiente preguntanan ta dirigí na bo persona ku ta ehersé e funshon di kuidadó di prinsipionan di bon gobernashon i di prinsipionan di integridat den gobernashon i atministrashon di nos isla. Gezaghèber ta hasi esaki, a lo ménos Gezaghèber tin ku hasi esaki komo un órgano outónomo pará riba partidonan i sin distinshon di persona i/o funshon.

Den e funshon ei Gezaghèber a konstatá posibel iregularidatnan i a ordená  un pre-investigashon i despues un investigashon formal riba dos punto ku a sali for di e pre-investigashon

Pregunta

  1. Komo ku e dosié di traspaso a trata BHM i su yunan, di kua Gezaghèber ta presidente di Reunion  di Akshonista di BHM (AVA) Gezaghèber no ta di opinion ku e investigashon for di den salida lo mester a bai den man di un instansia imparsial i independiente, manera entre otro diputado Den Heyer a sugerí i no mester a keda duná na bo konsehero(nan) riba e tema di integridat?
  2. Gezaghèber no ta di opinion ku e desishon aki a lanta e persepshon di  parsialidat i di no ophetividat i ku riba su mes a tacha e prinsipio di integridat?
  3. Gezaghèber ta dispuesto pa ainda pone e investigashon aki den man di un instansia imparsial i independiente pa kita tur persepshon di “belangenverstrengeling”?
  4. Ki ekspertisio di investigashon e konsehero i esnan ku a asistié ta disponé di dje. Den e kuadro aki Raad por a haña e CV di e persona(nan) envolví for di kua ta ilustrá nan ekspertisio riba e tereno di investigashon?
  5. Gezaghèber su antesesor den un kaso similar di investigashon kontra iregularidat a haña presentá un moshon di deskonfiansa ku a keda honrá pa Ulanda i ku a resultá den su retiro komo gezaghèber. Gezaghèber por informá raad si Gezaghèber a risibí un òf otro menasa den e direkshon aki similar na Gezaghèber su antesesor?
  6. Gezaghèber por informá Raad ku si den un òf otro forma Gezaghèber a kompartí resultado di e investigashon aki i/o konsultá ku un òf otro instansia gubernamental lokal òf di Reino ku no ta Kolegio Ehekutivo tokante e rapòrt aki.
  7. Sr. Gezaghèber, bo persona a ordená e investigashon. Sr. Gezaghèber tin e resultado. Ki konklushon Sr. Gezaghèber a saka for di e konklushonnan i ku konseho Sr. Gezaghèber tin pa Raad a base di ku Sr. Gezaghèber sí a tuma nota profundo di e kontenido di e rapòrt. Tabatin violashon si òf nò di prinsipionan di Good Corporate Governance i kuné violashon di prinsipionan di integridat?
  8. Si e kontesta ta SI ki paso Sr. Gezaghèber ta tuma pa ku e violashonnan riba nan mes i ki paso pa evitá den futuro ripitishon di e susesonan aki?

 

___________________________________________

Désirée Coffie, Miembro di Konseho Insular di Boneiru

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: