Premier Evelyn Wever – Croes: PROME MINISTER EVELYN WEVER – CROES TA FELICITA DIRECTIVA NOBO DI PARLAMENTO HUBENIL PA ANA 2020-2023

Premier Evelyn Wever – Croes:

 

PROME MINISTER EVELYN WEVER – CROES TA FELICITA DIRECTIVA NOBO DI PARLAMENTO HUBENIL PA ANA 2020-2023

 

Parlamento ta un di e tres pilarnan di e Trias Politica cu nos conoce desde 1748 y e tata di e filosofia tabata e Frances Charles Montesqui. Parlamento ta e Poder Legislativo, e otro dos pilarnan ta e Poder Ehecutivo y e Poder Hudicial. Trias Politica tabatin influencia riba henter mundo y a wordo considera como un di e guianan mas importante pa e structura politico di casi tur Pais nobo. Cu e Trias Politica, e poder absoluto di Rey a wordo reduci. Aruba como un Pais relativamente hoben, desde1 januari 1986, cual nos a sali for di bou di e ‘halanan’ di antiyas y nos a crea lasonan constitucional mas estrecho cu Hulanda. Asina nos a haya nos propio Gobernador, Parlamento y Gobierno. Den e constelacion nobo di Reino, Aruba por a dicidi ki rumbo e por bay y scoge na cua instancia internacional e ta afilia su mes. 

 

Separacion di poder ta bon, bo ta crea ‘checks and balances’ di bo sistema constitucional y un pilar tincu tene cuenta cu e otro pilar. Pa hopi tempo, despues cu Aruba a haya su status aparte, nos no tabatin un Parlamento Hubenil manera varios otro Pais si tabatin. Apenas 9 di juni 2003 a bin Fundacion Parlamento Hubenil. Parlamento hubenil pa su reunionnan mas importante den pasado a yega di conta cu sosten y apoyo di Parlamento di Aruba y a tene reunionnan den e sala. Awo cu a instala un directiva nobo pa Fundacion Parlamento Hubenil,  e directiva aki lo tin e tarea difcil pa rebiba y modernisa Parlamento Hubenil pa hibe na e siguiente nivel. 

 

Participacion di hobennan ta fundamental den e mundo cu nos ta bibando aden. Pesey como Prome Minister mi ta compromete mi mes na duna Parlamento Hubenil un vos a traves di reunionan riba base regular pa delibera riba diferente tema di interes general pa nos hobennan hunto cu Gobierno. Alabes kier expresa e deseo di por mira Parlamento Hubenil profila su mes mas internacionalmente y intercambia experiencia talves cu Parlamentonan Hubenil den region. Ta kere cu como miembronan di directiva tin un bunita tarea. 

Ta gradici colega Minister Glenbert Croes pa e sosten cu el a duna e hobennnan y ta garantisa cu por sigui conta riba dje. Finalisando kier gradici cada un di bosonan pa pone tempo disponibel pa haci esaki. E tarea ta grandi pero sigur hopi bunita!, Prome Minister a termina bisando.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: