APERTURA OFISHAL ENTRADA NOBO JJIC

APERTURA OFISHAL ENTRADA NOBO JJIC

Geplaatst op 03 December 2020 dor di Ministerio Hustisia

WILLEMSTAD – Djabièrnè 27 di novèmber último a tuma lugá e apertura ofisial di e entrada nobo di JJIC na Kwartier. Esaki a sosodé den representashon di Minister di Hustisia dor di Sekretario General interino di e Ministerio, sra. Lai-Promes, den kompania di e Direktor di Sektor interino, sra. Van der Gen, i hefe di e instituto sra. Albertoe-Pinedo.

E entrada ta e último parti di un proyekto di kura di JJIC ku a keda realisá den kuadro di un di e prioridatnan di maneho di Ministerio di Hustisia i di JJIC, esta pa “Subi nivel di seguridat pa e hóbennan ku ta keda den e instituto”. E kura i entrada nobo, moderno aki ta brinda e grado di seguridat nesesario ku ta un di e kondishonnan mas importante pa por reeduká e hóbennan na un manera efektivo. Un porta ku ta brinda entrada i salida pa un mihó perspektiva pa futuro di hóbennan di JJIC.

DOS FASE

E trabounan di kura i entrada nobo di JJIC a tuma lugá den 2 parti. Den e promé parti a hasi renobashon di e wayanan di e kura kompleto. E trabounan aki a start na yanüari 2017 i a terminá na mart 2018. Den e di dos parti a konstruí un edifisio nobo pa pòrtir i 2 porta di entrada outomatisá.

E trabounan aki a keda ehekutá dor di Dusron Bouwbedrijf bou di supervishon di arkitektonan di Versbouwbedrijf. A kuminsá ku fase 2 den sèptèmber 2019 i ku un tiki retraso pa motibu di e.o. “lockdown” e trabounan a terminá na yüli 2020 ku entrega di e yabinan. Durante di periodo di renobashon tur trahadó i bishitante a hasi uso di e porta na Comanchestraat. Entrante ougùstùs 2020 a kuminsá hasi uso di e entrada nobo di JJIC, wardando e apertura ofisial dor di outoridatnan di Ministerio di Hustisia.

APERTURA

Durante di e apertura ofisial a gradisí tur esnan ku a duna nan aporte pa e proyekto tan importante aki por a bira un realidat. Tambe a hasi entrega di e karchinan destiná pa tur personal na e hefe di JJIC i a hasi un yamada na nan pa kuida nan karchi bon pa evitá ku esaki ta kai den man di personanan indeseá.

E hóbennan di JJIC tambe a ekspresá nan alegria i gratitut durante e apertura ofishal den forma di un baile di Jerusalema i un poesia  ku ta bisa lo siguiente. Nan Entrada. Un kaminda pa drenta i un kaminda pa sali. Un kaminda pa desaroyá nan mes i un kaminda pa progreso. Un kaminda pa nan siña stima nan mes i un kaminda pa éksito. E entrada di JJIC ta e porta pa un futuro briante dor di siña abilidatnan, segun e poesia. E hóbennan ta orguyoso di nan porta, nan entrada e kaminda pa nan siña ta un ser humano responsabel, positivo i ehemplar.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: