Minister Croes riba Dumingu di su huramentashon a hasi un rekorido Kultural Deportivo na Bándabou.
Minister Croes riba Dumingu di su huramentashon a hasi un rekorido Kultural Deportivo na Bándabou.
Willemstad – 6 di desèmber 2020
Djadumingu mainta Minister di Enseñansa Siensia Kultura i Deporte (ESKD) Señor Steven Croes a bishitá Bándabou komo parti di su trayekto di sera konosí ku su área di trabou, manera ántes tabata tradishon.
Minister Croes a kuminsá e mainta ku un bishita na fèlt di Lagun i fèlt “Aishel Hooi” na Rio Magdalena, kaminda representantenan di ámbos fèlt a duna informashon di estado di e féltnan. Despues Minister Croes a bishitá fèlt di Barber. Aki direktiva kompleto a risibí minister i a inform’é tokante desaroyonan di e fèlt.
Minister a kontinuá e mainta ku un bishita na baluartenan di nos pueblo manera Serapio Pinedo, Señor Rudi Rooi i Señora Lidia van Uytrecht miho konosí komo Shon Tool. Señor Serapio ta un konosido tokadó di Ka’i Orgel, Señor Rudi Rooi un gran baluarte ku a hasi hopi pa kultura di Kòrsou espesialmente na Banda Abou. Shon Tool ta un gran organisadó di fiestanan kultural bailabel.
Minister a finalisá e mainta ku un bishita na Marshe di Barber, kaminda el topa ku otro baluarte señora Vera Djaoen ku a destaká den deporte i ku a duna Minister un rekorido den e marshe.
Un mainta fruktífero ku no solamente a duna minister Croes un bon bista riba un área spesífiko di su trabou pero ku alabes dirigentenan i baluartenan di nos pueblo a konosé Minister Croes di aserka loke ta krea un base di konfiansa pa huntu atendé desaroyo di e áreanan aki di su kartera di un manera harmonioso i efikas.
