Premier Evelyn Wever-Croes cu apelacion na comunidad:  BAN SIGUI TA CUIDADOSO PA POR DISFRUTA DIANAN DI FIESTA TRANKIL DEN SENO FAMILIAR

 

Premier Evelyn Wever-Croes cu apelacion na comunidad: 

BAN SIGUI TA CUIDADOSO PA POR DISFRUTA DIANAN DI FIESTA TRANKIL DEN SENO FAMILIAR

 

Segun e cifranan di mas recien, Aruba awor conoce 107 caso activo di Covid. Esaki ta mustra nos cu e virus ta presente ainda memey di nos. Berdad ta cu a logra domina e crecemento di contagio, compara cu dos siman pasa, sinembargo e virus tey ainda den nos comunidad. P’esey Prome Minister Evelyn Wever-Croes ta haci apelacion na un y tur pa sigui ta cauteloso y pa nos sigui cuida. 

 

“Aworaki net prome cu Pasco y Aña Nobo, ban ta extra cauteloso pa asina por celebra e dianan di Pasco y Aña Nobo trankil. E aña aki e celebracion di fin di aña no lo por ta manera antes memey di hopi hende of cu hopi fiesta, pero si cu esnan di mas cerca, mester ta cauteloso aworaki. Bisti apaboco tur caminda como proteccion propio y di otronan. Ademas tene distancia di hende, no bay caminda tin hopi hende ta aglomera, no brasa of sunchi otro hende y aplica e reglanan di higiena mastanto cu ta posibel, laba man y si no por, uza hand sanitizer. Finalmente si tin un sintoma keda paden y tuma contacto cu bo dokter di cas.

 

Si nos por aplica e reglanan aki, nos por garantisa otro cu nos por tin dianan di fiesta trankil y nos por pase den seno familiar. Si nos wak un rato kico ta pasando rond mundo, manera na Corsou, Hulanda, ta mirando cifranan di contagio nobo y cifranan di contagio hopi halto. P’esey nos mester ta extra cauteloso y extra agradecido cu Aruba si ta logrando di tin e cantidad di contagio bou di control, pero nos no por descuida nos mester keda cuida,” Premier Wever-Croes a enfatisa. 

 

Prome Minister a enfatisa cu e cantidad di movecion den oranan di anochi ta keda preocupante, pasobra e no ta husto pa despues di un anochi di gozo, henter un comunidad y economia por wordo afecta. 

 

“Di akinan pues un apelacion fuerte na henter comunidad, ban ta extra cuidadoso e dianan aki anto asina nos lo pasa dianan di fiesta den mas tranklidad gozando un poco den seno familiar”, Prome Minister a expresa.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: