KOMUNIKADO OFISIAL – EFREM J
KOMUNIKADO OFISIAL – EFREM J
Den relashon ku loke a pasa durante e evento di 7 di novèmber na Kòrsou, nos ke kompartí algun palabra ku nos públiko i duna un splikashon tokante loke a sosodé durante e presentashon di Efrem J.
For di kuminsamentu di e preparashonnan pa e evento, Efrem J tabata forma parti di e programa, ku konosementu i aprobashon inisial di e ekiponan envolví. Tabatin promoshon, tabatin hopi ekspektativa i hopi fanátikonan a kumpra nan tiket ku e ilushon pa mira i disfrutá tambe di e presentashon di nos artista internashonal di Kòrsou.
Sin embargo, riba mes dia di e evento, e ekipo di produkshon di Romeo Santos i Prince Royce a tuma desishonnan di último momento ku a afektá direktamente e partisipashon di Efrem J.
Dilanti di e situashon aki, Moves Entertainment a defendé te na último momento e partisipashon di e artista, teniendo na kuenta ku tabatin hopi hende ku a paga nan tiket tambe spesífikamente pa mira Efrem J.
Despues di diferente kòmbersashon, a yega na un akuerdo pa Efrem J por presentá, pero bou di e kondishon ku e no por interpretá bachata. Efrem J a aseptá e kondishon aki pa por yega na un punto di entendimentu i, mas importante ainda, pa kumpli ku su fanátikonan ku ya a paga pa wak’e kanta.
Lamentablemente, na momento ku Efrem J mester a subi riba tarima, a surgi problema nobo ku e sistema di lus i zonido, loke a afektá su presentashon. E situashon aki a sosodé apesar di e akuerdonan ku ya tabata hasi anteriormente.
Nos ke pone kla ku Efrem J no a kanselá su presentashon. E a skohe pa subi riba tarima pa motibu di rèspèt, amor i kompromiso ku tur e personanan ku a paga nan tiket i ku tabata spera ku nan por a disfrutá di su músika.
Pa tur esnan ku durante su presentashon tabata grita i pidiendo bachata, nos ke splika ku Efrem J no a interpretá bachata pasobra esei tabata un di e kondishonnan ku a pone pa e por a realisá su presentashon. No tabata pa falta di gana, ni pasobra e no tabata ke duna su públiko loke nan tabata pidi.
Nos ke ekspresá un gradisimentu spesial na Moves Entertainment, pa nan firmesa, pa defendé e partisipashon di un artista di Kòrsou i pa nan lucha te na último momento pa respetá e kompromiso ku nan tabatin ku e públiko.
Nos ta rekonosé tambe tur e esfuerso ku nan a hasi durante e presentashon pa protehá e integridat i bienestar di Efrem J, mirando e situashon difísil i inesperá ku a presentá na último momento.
I naturalmente, nos gradisimentu mas grandi ta bai pa Boso, nos públiko.
Masha danki pa boso a kanta, disfrutá, sostené i mustra boso kariño pa Efrem J, asta ora hopi di boso por a ripará ku algu no tabata kana manera ku mester tabata. Boso energia, apoyo i amor tabatin un balor grandi pa nos.
Efrem J ta un artista ku ta representá Kòrsou ku orguyo i ku ta meresé mesun respet, konsiderashon i profesionalismo ku kualke otro artista, sin importá su orígen ni su trayekto.
Esaki no ta pa krea konflikto ni pa ataká ningun hende. Esaki ta un kestion di rèspèt, kompromiso i balorashon pa e públiko ku ta paga pa un tiket sperando pa haña e eksperensia ku a primintí nan.
Efrem J a kumpli ku su públiko. E a subi riba tarima, a duna kara i a mustra su kompromiso, asta bou di sirkunstansianan ku tabata kompletamente pafó di su kòntròl.
Rèspèt pa e públiko i pa nos artistanan mester ta semper mas importante ku kualke diferensia.
Ku rèspèt i hopi gradisimentu,
EFREM J & MANAGEMENT
