Advertisements

Kantadó/kompositor Dorette Pautit ta laga su kurason papia “Save it for a lifetime” a nasé di nostalgia pa Kòrsou

Kantadó/kompositor Dorette Pautit ta laga su kurason papia

“Save it for a lifetime” a nasé di nostalgia pa Kòrsou

 

WILLEMSTAD – Kantadó/kompositor Dorette Pautit a lanta entre dos kultura i ta lucha tur dia ku e forsa magiko ku e dushi isla Kòrsou a duné. Ku nuebe aña di edat e a muda ku su famia pa Kòrsou, e isla deskonosí na e otro banda di e osean. E ambiente rilèks kaminda e a lanta te ku su diesinku aña nunka mas e no por a laga bai. E ta biba na Amsterdam pero su kurason a keda Kòrsou pa semper. Pa laga e nostalgia papia e a kompositá e kantika “Save it for a lifetime”. Un kantika ku instrumèntonan akústiko i un vibrashon kurasoleño.    

 

Ora e ta pensa riba e dushi solo na Kòrsou durante e lunanan skur na fin di aña e sintimentu paraiso ta kuminsa bati den su kurason. Kadushinan ku ta baila, pali kokonan, e solo, e laman, dòlfeinnan i e playanan dushi. Tur e fasetanan ta forma parti di su kantika “Save it for a lifetime” ku e a kompositá. E kantika a forma ku instrumèntonan akústiko, kanta i ku bati man i asina Pautit ke konta su historia na un manera musikal. E kantika a wòrdu skirbi i kopositá ku amor di kurason pa Kòrsou. E ke konekta hende ku otro na un manera musikal. Na desember 2017 e no sa dikon pero e a sinti un forsa di ariba pa skirbi i kompositá e kantika. Pautit a kuminsa toka riba su gitara i den un rati ora e ritmo i e letranan a bira un realidat. E basiko di e kantika a mira lus i despues e mester a yena e sobra parti ku otro musikantenan i su produktor Lode de Roos.

Pa enter medio di e musikante kurasoleño Vernon Chatlein e a sera konosi ku e perkushonista Tshepo Pietersz. E tabata biba na Kòrsou atrobe pero esei no a stroba pa graba e parti perkushon. Pietersz a graba su parti na Kòrsou den studio i a mandé Ulanda via enternèt. Despues un otro musikante Ulandes Roy van Oost a graba e parti mandolina, gitara akústiko i duarsflùit. Pautit mes ta hopi orguyoso di e resultado. E mes ta bisa ku e ta riba un mishon pa mustra su amor i pashon pa Kòrsou ku e ke parti ku ortro hende. Kada bes ku e por e ta bula pa Kòrsou kaminda i tin hopi memoria di su hubentut i e gusta bai playa Lagun. E ambiente ku e ta topa einan ta trese ‘back to the roots’. E solo kayente, e hendenan amabel, e laman dushi i e playa ta duné un pas kompletu ku e ta sinti su mes den un otro mundu. 

Pautit (54 aña) den su hubentut a siña toka blòkflùit, piano i gitara. E ultimo añanan e a tuma lès di kantamentu i e a kanta den diferente banda musikal na Ulanda. Otro musikante a inspirá Pauptit pa traha su propio komposishonnan i bai duna su mes presentashonnan. E artista a toka diferente kaminda kaba na Amsterdam entre otro: de Melkweg, bluescafé Maloe Melo, un festival multikultural den Oosterpark huntu ku Runny Margarita, hotel American, hotel Max Brown, het Tugelahuis den e bario Transvaal, het van Eesteren festival i den e tayer di e eskultor Nelson Carrilho na Amsterdam. 

    Spotify:

Save It for a Lifetime van OceanChild

https://open.spotify.com/track/5IOf21t7HmwBFlzTN06oZ7?si=baaTfIL4R36F0l_MUjcjVg 

 Mp3:

                      

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: