Pa tur loke Hildward Croes a significa pa Aruba su Carnaval GOBIERNO DI ARUBA A HONR’E CU UN CAYA NA SU NOMBER

 

Pa tur loke Hildward Croes a significa pa Aruba su Carnaval

GOBIERNO DI ARUBA A HONR’E CU UN CAYA NA SU NOMBER

 

Diahuebs 17 di december 2020, ta pa semper un dia hopi special pa famia en especial pero tambe pa henter Aruba cu a conoce y stima e gran musico di nos pais, señor Hildward Croes den feliz memoria. Iniciativa di SMAC, dirigi pa e expresidente Shannon Henriquez, y ex miembronan Ghislaine Winterdal y Joally Croes a haci cu awe Hilward Croes tin un caya dedica na su nomber. Sra. Shannon Henriquez na e ocacion special aki a hiba palabra y a conta tiki di e historia di Hildward Croes.

 

“Cu hopi alegria mi ta para akinan representando no solamente e tresnan cu a firma cu ta Joally Croes, Ghislaine Winterdaal y mi persona na nomber di SMAC, pero tambe e board nobo di SMAC cu su Presidente nobo Jason Brown, tur musico y cultura di Aruba cu tanto Hildward a stima y a contribui grandemente na dje. 

 

Net prome cu nos a finalisa nos 5 aña den bestuur di SMAC, nos a acerca Gobierno di Aruba cu e peticion pa e caya aki haya nomber di e gran musico aki.

 

Hildward semper su deseo tawata pa e musiconan tin mas participacion hunto cu e organisadornan di Carnaval. Ora a funda SMAC, Stichting Musica, cu Hildward a funda na 27 Januari 2012, esaki a bira realidad.

 

Hildward a lanta Dushi Band na aña 1990, dia 12 di January 2008 riba cumpleaños di Mama Ada y hunto cu su ruman Aldrick Croes, a lanta Dushi Carnival Group y hunto nan a innova Carnaval. Dushi Carnival group a bira un di mas popular na Aruba. Rijnan largo pafo di cas di Mama Ada y Papa Maiky pa forma parti di e musica di Dushi Band y e grupo di Dushi Carnival Group. 

 

Hildward no ta tawata kier un trailer pa Dushi band, sino e tawata kier pa e ta un “stage” pa e pone su show den cada parada y asina e la exigi pa e trailer ta “Low boy” unda e por tawata mas cerca di su publico. 

 

Mesun detayista cu e tawata cu su musica e tawata cu tur cos cu ta parti di e show cu e tawata pone den cada parada di Carnaval. Uniform di Dushi Band mester tawata semper otro color cu e massa.

 

Hildward y su Dushi Band a competi tur aña na e festival mas grandi di Aruba y ta gana Roadmarch King hunto cu Teddy Philipps cu e famoso cantica cu te awe ta zona Music is we language. 

 

Hildward a contribui asina hopi na Carnaval di Aruba cu un dia no ta suficiente pa splica kico tur e la haci pa Aruba su fiesta di mas grandi, CARNAVAL.

 

Awe riba 6 aña cu el a bay laga nos, no solamente el a laga un bashi grandi atras pa su famia, su banda, su grupo, tur musico cu e la inspira, sino e ta laga un bashi grandi pa nos Carnaval. 

 

Agradecido pa tur locual e la contribui y tur esnan cu el a inspira awe, nos ta honr’e y bis’e danki cu Caya Hildward Croes. E caya aki unda tawata tin rijnan largo pa baila y gosa e show cu e tawata pone den su dushi Carnaval.

 

Danki Hildward Croes pa ta nos inspiracion, Danki Gobierno di Aruba pa honr’e awe”.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: