Segun Parlamentario Jeser El Ayoubi: “Mester wak e plachi mas grandi i pone atenshon na kosnan ku no ta kana bon den e kuerpo!”

Segun Parlamentario Jeser El Ayoubi:

“Mester wak e plachi mas grandi i pone atenshon na kosnan ku no ta kana bon den e kuerpo!”

 

Willemstad- Resientemente Parlamentario sr. Jeser El Ayoubi a tuma nota di un voice note ku tabata pa konsumo interno di kuerpo polisial, pero ku di un manera of otro a yega retnan sosial. Den voice note aki e funshonario polisial ta ekspresá su preokupashon pa un situashon serio den e kuerpo i lokual ta meresé atenshon serio.

Den e voice note e funshonario ta señalá kosnan básiko ku e kuerpo ta karesé di dje i korektamente e funshonario ta pidi atenshon pa esakinan pasobra e situashon ta unu sumamente demotivante pa miembronan. Segun sr. El Ayoubi mester pone atenshon na e nesesidatnan di e kuerpo pero tambe traha riba solushonnan pa atendé ‘once and for all’ ku e problemátika aki.

Sr.El Ayoubi ta enfatisá ku sin e atenshon aki, e funshonamentu di e kuerpo no por drecha i e nivel di servisio ku ta duna komunidat no por bira mihó. Sin un nivel di servisio adekuá e kuerpo no por kumpli ku su meta ku ta di “sirbi i protehá”.

Segun e Parlamentario ta algu sano ku internamente ta hala atenshon di otro ku e meta pa drecha funshonamentu di e kuerpo. Sinembargo ta di lamentá e forma ku e voice note a lèk i yega riba retnan sosial.

No opstante e lèkmentu aki esei no ta kita ku mester wak e plachi mas grandi i pone atenshon na kosnan ku no ta kana bon den e kuerpo. Sr. El Ayoubi ta sigui bisa ku e ta spera tambe ku e voice note aki lo sirbi pa tur esnan ku ta karga responsabilidat pone kabes huntu i kuminsá traha efisientemente riba mehorá funshonamentu di nos kuerpo polisial. Esaki lo ta sano pa kada miembro di e kuerpo ku alabes lo sigui sirbi i protehá nos komunidat komo debe ser.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: