Prome Minister Evelyn Wever-Croes: PROME MINISTER Y SECRETARIO DI ESTADO KNOPS A BISHITA FUNDACION CONTRA VIOLENCIA RELACIONAL

 

Prome Minister Evelyn Wever-Croes:

 

PROME MINISTER Y SECRETARIO DI ESTADO KNOPS A BISHITA FUNDACION CONTRA VIOLENCIA RELACIONAL

 

E siman aki Secretario di Estado Raymond Knops ta na Aruba pa un bishita di dos dia. Despues di tabatin un reunion cu Prome Minister Evelyn Wever-Croes, a bishita Fundacion Contra Violencia Relacional (e fundacion aki antes tabata yama Fundacion pa Hende Muhe den Dificultad. 

 

E motibo tras di e bishita aki ta relaciona cu e hecho cu a pone placa disponible pa e Fundacion aki. Un aña y mey pasa ora cu a bira conoci cu Hulanda ta dispuesto pa pone fondo disponibel pa combati e crisis di Venezuela, a propone pa e Fundacion haya parti di e fondo pa por expande e shelter pa por yuda esnan cu ta wordo abusa (violencia domestico). 

 

Un di e motibonan cu a dicidi di yuda e Fundacion cu e fondo aki ta e aumento den cifranan desde e crisis di Venezuela, sea ta nos propio localnan cu ta aplica abuso riba hende muhe Venezolano of pareha Venezolano cu a bin Aruba door di e situacion dificil, cu tambe tabata cay victima di violencia relacional. Pues a propone e proyecto aki y hunto cu CEDE Aruba y Gobierno Hulandes a bay di acuerdo pa inverti pa por a expande e shelter. 

 

Segun tratadonan internacional, pa cada 10 mil persona cu ta biba den un Pais, bo mester di 1 camber/ shelter pa dado caso algo sosode. Aworaki Aruba ta cumpli cu e rekisito aki y hasta mas amplio cu esey. Esaki ta danki na e proyecto aki, financia door di Gobierno di Hulanda hunto cu CEDE Aruba y momento cu a bira conoci cu Gobierno Hulandes ta bay inverti den ampliacion, tabatin mas partners local cu tambe a inverti. 

 

Prome Minister Evelyn Wever-Croes ta felicita e directiva di e Fundacion pa e trabou enorme cu nan ta haciendo y e directora nobo cu ta hopi pasiona cu su trabou.

 

“Esaki ta un facilidad cu niun pais ta desea di tin, pero e ta un realidad. Especialmente aworaki den crisis e ta un realidad cu no por sconde, p’esey mi ta contento cu por tin e facilidadnan aki”, Prome Minister a duna di conoce.

 

Prome Minister a indica tambe cu Secretario di Estado Raymond Knops tabata hopi contento tambe pa mira tur e trabou cu a wordo haci cu e fondonan cu a wordo poni disponibel door di Hulanda. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: