Ta basta traha bòl di hilu Calmes:”Parkermentu den siudat mester di un solushon práktiko awó!.”

 

 

Ta basta traha bòl di hilu

Calmes:”Parkermentu den siudat mester di un solushon práktiko awó!.”

Willemstad- Parlamentario Calmes ta lamentá ku ainda e problema di  parker den sentro di siudat no ta solushoná. Ta konosí ku parkermentu den sentro di siudat a wòrdu privatisá algun aña pasa. Diferente establesimentu den nos siudat a trese nan preokupashonnan dilanti dje forma ku kontròl di parkermentu ta wòrdu hasi. Konforme vários komersiante e forma ku a privatisá e parkermentu a hasi bishita di nos siudat hopi ménos atraktivo. E kombinashon di paga pa parker í forma di kontrolá a sòru pa un impakto negativo riba benta di pakusnan den sentro di siudat.

Aña pasa e kontrakt ku e kompania priva a wòrdu terminá. Ta fresku den nos memoria ku vários dje komersiantenan den Punda i Otrobanda a uni pa nan por a tuma henter e operashon di parkermentu huntu ku Gobièrnu kreando un “Public-Private partnership”. Sinembargo e Minister di VVRP no a duna oido n’e union di komersiantenan aki. Pa kolmo e proseso ku Gobièrnu a kuminsá ainda no ta kla. 

“Ta basta ku traha bòl di hilu”; sigun Calmes. Gobièrnu mester bini ku un solushon práktiko enbes di re-inventá e wil di nobo. Calmes ta lamentá ku Gobièrnu ta preferá di kana un kaminda di krus enbes di aktua diligente. E solushon propon’é pe komersiantenan no tin ganashi komo propósito manera e aktual kompania priva. Alkontrario, e sèn generá nan kier hinka bek den mantenshon di nos sentro di siudat ku ta grita pa mantenshon. Esaki lo yuda na hasi nos siudat, rekonosé dor di UNESCO, atraktivo bek. Un otro bentaha pa laga e komersiante nan (ko-) manehá parkermentu ta paso nan konosé e moveshonnan den kaya mihó ku kualke otro entidat. Calmes ta kere ku no mester pèrdè e momentu pa mustra kon huntu por realisá algu positivo.

This site uses Akismet to reduce spam. Learn how your comment data is processed.

error: Content is protected !!
%d bloggers like this: