Instrukshon finansiero i CHE-COHO:  “Inhustisia sin presendente”

Instrukshon finansiero i CHE-COHO:  “Inhustisia sin presendente”

 

Willemstad, 18 yanüari 2021.  Kabinet Rutte III a entregá su retiro dia 15 di yanüari último komo konsekuensia di un rapòrt titulá “Ongekend Onrecht” (Inhustisia sin presendente), den kua e investigadornan parlamentario a yega na konklushonnan durísimo. Tantu e lei ku e Parlamento mes a pasa tokante supsidio pa yu (kindertoeslag), komo e manera di ehekushon kruel i sin kompashon di e lei dor di Kabinete  Rutte i riba dje e fayo hasta di wes pa protehá e suidadanonan, tabata pa años violashon di e prinsipionan fundamental di estado di derecho. E ehekushon dor di gobièrnu, espesialmente e servisio di impuesto, a sosodé sin niun bista pa konsekuensianan individual, i wes tambe a apliká e lei inesesariamente duru. Nan a pèrde e hende for di bista.

 

Instrukshon finansiero  i inhustisia sin presedente

Ta bon pa nos para ketu, ku e inhustisia  a sosodé meskos ku e instrukshon na 2019 na Kòrsou, pa baha gastunan riba presupuesto den 3 aña en bes di den 5 aña manera proponé. No obtante ku IMF i Cft a konsehá pa duna Kòrsou mas tempu, e gobièrnu durísimo Ulandes a insistí. Baha gastu den tres aña ta mishi direktamente i duru ku tur Fundashonnan den kuido pa tantu e kliente komo e trahadó, kontratistanan, etc, esta servisionan ku gobièrnu ta kumpra. Lo e la nifiká menos tempu pa ahustá, i mas hende lo a keda sin trabou. Aki Raad van State a mustra gobièrnu Ulandes, ku Kòrsou ta outónomo i ta gobièrnu di Kòrsou ta disidí riba e periodo pa balansá e presupuesto. Gobièrnu Ulandes a persistí den e atendementu durísimo aki pa ku nos komo pueblo i a pidi Raad van State pa rekonsiderá. Pa di dos biaha Raad van State mester a mustra ku Ulanda no tin rason.

 

CHE-COHO i i inhustisia sin presedente

Ora e pandemia mundial di Covid 19 a presentá ku a kibra ekonomianan mundial, Hulanda a probechá e momentu mas difísil den historia di Kòrsou, pa eksigí ku un órgano di gobernashon independiente Hulandes (Zelfstandig bestuursorgaan -ZBO), yama engañosamente: Caribisch Hervormings Entiteit (CHE) mester tuma medida na Kòrsou. Despues a purba tira santu den nos wowo, i bin ku Caribische Ontwikkeling en Hervormings entiteit (COHO) ku ta un entidat huridiko según lei Ulandes ku tareanan idependiente i ku su miembronan ketubai ta gobièrnu Ulandes ta nombra. Puru kosmetika.  Nada no a kambia, ta Gobièrnu Ulandes lo nòmbra 3 persona na Ulanda pa formulá i ehekutá medidanan ku lo generá un inhustisia sin presendente den nos pueblo. PIN ta invitabu,  pa bo mes tuma nota di e “Landenpakket”, kaminda ta papia di hiba nos pueblo na un norma Caribense, ku nos no sa si ta konforme Venezuela, Haiti of di kua isla nan ta papia. Ta e intenshon pa baha salario di ambtenaar i penshun di eks-ambtenaar, pa djis menshoná algun medida ku lo kondusí na muchu mas pobresa ku tin den nos komunidat kaba. Baha salaris ta baha forsa di kompra, lokual ta trese mas pobresa.  

 

Stòp ku medidanan kruel i sin kompashon ku ta okashoná inhustisia sin presedente

PIN ta spera ku e kaída di Gobièrnu Ulandes, ta pone tantu e gobièrnu Hulandes komo e gobièrnu di Kòrsou, realisá ku e konklushonnan di e raport “Ongekend Onrecht” ta aplikabel riba e situashon ku e organisashon di CHE-COHO manera e ta ankrá den e Akuerdo Polítiko di novèmber 2020 lo kousa. Un entidat hurídiko Ulandes, ku ta konsistí di 3 hende nombrá pa gobièrnu Hulandes, ku ta biba 9000 kilometer leu i no tin ningun responsabilidat ante parlamento (lesa: pueblo) di Kòrsou. Si na Ulanda mes a implementá medidanan kruel i sin kompashon, ta kiko lo para di nos pueblo si nos no resistí CHE-COHO?

 

Alternativa pa CHE-COHO

PIN a formulá un alternativa pa e paisnan den Karibe, Kòrsou, Aruba i Sint Maarten, traha huntu ku Ulanda a base di rèspèt mutuo i atendé e reformanan nesesario di forma balansá.