Mi kurason ta yora

*Mi kurason ta yora*

 

Mi kurason te ainda ta hasi doló di mira kuantu sèn a keda inbertí dor di partidonan politiko pa un solo dia den un simpel entrega di lista. Mi kurason ta yora pa e echo ku nos sa kuantu hende a pèrdè nan entrada of parti di nan entrada dor di Covid-19. E pandemia aki a kousa ku awe tin hopi hende ku problema finansiero i mental. Hendenan ku a pèrdè nan outo i kas pa e echo ku nan no tin sufisiente entrada mas of no tin entrada mes. Den sektor di horeka tin mas ku 10 mil hende ku a pèrdè nan entrada i nan ku ta den un posishon hopi difisil. Aktitut di algun lider no ta bon. Lidernan mester purba korda ku nos pais ta un pais den desaroyo ku hopi desempleo i no un pais desaroyá.

 

Si di kurason nos ke bira un komunidat uní, nos mester kuminsá kombibí mas ku otro. Sigur kombibí ku e hendenan ku no tin e fasil aworaki dor di e pandemia. Ban kuminsá inbertí pa nos siña e hendenan piska of planta pa nan por bira mas outosufisiente, esta ku nan por sòru pa nan mes i ta dependé menos di otronan pa e nesesidatnan mas klave pa biba. E tipo di agasahonan manera esnan di djaweps último ta ponemi kòrda riba e piesa di “doble R” ku ta bisa: “Ta parse ku nos ta biba riba un mundu rabiá”. Mi kurason ta yora!

 

Ban hiba un kampaña dirigí riba kontenido ku proposishonnan konkreto kon avansá kalidat di bida di kada siudadano den nos pais.

 

Kòrsou 24 – 01 – 2021

G-no Valeriaan