Pa PIN awo si awa a pasa hariña! Aruba ya a saka destaho pa kanabis, antu aki nos ta sigi drumi.
Pa PIN awo si awa a pasa hariña!
Aruba ya a saka destaho pa kanabis, antu aki nos ta sigi drumi.
Willemstad — Dia 22 yanuari Aruba su Bureau Medicinale Cannabis a anunsiá un destaho públiko pa produkshon di kanabis medisinal, eksaktamente segun e modelo ku PIN su eks-minister Camelia-Römer a traha pa Kòrsou. Na Kòrsou ketu bai ta blòkia e lei pa motibunan polítiko.
Un parti di koalishon ta pidibu sigi kana kun’e, pero e mes ta paralisá riba e topiko aki tambe. E otro parti ta primintí ku Kòrsou tei krese, pero su forsa di konvikshon no ta yega mas leu ku negoshá pa su miembo sali i drenta parlamento. Partidonan den oposishon tambe ta sigi ku polítika di kouch’i boulo i oponé kontra tur lei ku gobièrnu presentá.
Ku rèspet pa tur hende, PIN ta pidi tur polítiko serio, di oposishon i koalishon pa por fabor madurá i reuní pa atende e lei riba kanabis medisinal komo ‘lopende zaak’ na bienestar di e miles di suidadano ku si mester di un trabou.
Inmadures
Den un komunikado foi na final di november 2020, PIN a mustra riba e importansha pa atende ku e proposishon di lei riba kanabis medisinal. Dikon? Paso PIN a i lo sigi pone aksento riba e kuponan di trabou i e ekspanshon ekonómiko ku e sektor aki lo krea. Tur esaki lo hasi nos menos dependiente di e yudansa Hulandes of di kualke otro pais. Pa PIN ta mas ku lógiko ku politikonan ku ta respetá nan mes i ta respeta e komunidat ku nan ta sirbi, semper lo kana den e direkshon di outo-sufisiensha. Ku Aruba a traha aselerá riba su trayekto di kanabis medisinal ta prueba palpante ku PIN ta riba e bon kaminda ku esaki. P’esei ta duel Partido PIN ku lider di gobièrnu no por konvense ni sobrá di parlamento pa kana kun’e den e asuntu aki.
Tin solushon
Naturalmente PIN ta na altura ku pa atende esaki oposishon mester habri kaminda pa representatenen di pueblo reuní. P’esei mes PIN ta pidi koalishon i oposishon pa madurá i representa pueblo di berdat. Den e lunanan ku ta bin ta asuntunan koriente so parlamento por atende tòg. Pues kontinua e bòykot di reunion no tin sentido.
PIN ta yama pa sigi kana ku e pueblo di berdat, buska kresementu di berdat. Wak mas leu ku un of otro miembro ku meste drenta parlamento i hasi palabrashon entre tur frakshon pa kompleta parlamento, yama reunion i trata e lei di kanabis medisinal. E miles di suidadano ku si meste un trabou no merese pa Kòrsou kai mas atras riba e trayekto di kanabis medisinal tambe.
