Prome Minister Evelyn Wever-Croes: Minister President Evelyn Wever-Croes tocante Landspakket: RIBA TERENO DI INFRASTRUCTURA E LANDSPAKKET LO YUDA NOS ELIMINA ATRASONAN NA DIP Y STIMULA NOS ECONOMIA

Prome Minister Evelyn Wever-Croes:

 

Minister President Evelyn Wever-Croes tocante Landspakket:

RIBA TERENO DI INFRASTRUCTURA E LANDSPAKKET LO YUDA NOS ELIMINA ATRASONAN NA DIP Y STIMULA NOS ECONOMIA

 

      

Parlamento a pidi Gobierno pa duna informacion tocante e uitvoeringsagenda (agenda di ehecucion) cu Minister Presidente a firma e siman aki cu Secretario di Estado Knops. E uitvoeringsagenda ta e resultado di un proceso intensivo durante cua pais Aruba y Hulanda a yega na un acuerdo pa sosten di likides a base di e Landspakket firma 13 di november 2020. Despues di e periodo aki tanto Hulanda como Aruba a apunta un asina yama Tijdelijke Werkorganisatie (TWO) pa fungi como procesbewaker y pa percura cu e trabounan preliminario tuma luga den bon forma. 

 

Den e landspakket tin atencion tambe pa e tema di ‘ruimtelijke ordening’ y e responsablidad di DIP. A informa Hulanda cu Aruba tin su ROP y cu e aña aki lo stipula e ROPV. Lo studia cua ta e miho forma pa Pais Aruba baha gasto di huur di edificio di gobierno.

 

Pa loke ta e organisacion di DIP, e enfasis ta riba elimina e atrasonan den trabounan. 

 

“Ora mi a tuma over e ministerio di infrastructura, mi a topa un atraso di 7800 persona ta wardando un tereno pa construi nan cas, desde 2012/2013. 120 compania ta wardando tereno comercial, 1300 persona ta wardando un tereno ‘huurgrond’. Y asina den practicamente tur producto di DIP tin atraso, y esey ta frena e desaroyo economico di un pais. Cu e atencion awor den e Landspakket, lo ricibi asistencia pa ditigalisa e procesonan, pa asina por elimina e atrasonan. E plan cual procesonan mester wordo ditigalisa, mester ta cla dia 15 di maart 2021, bou di punto E7, y nos ta trahando riba dje”, Prome Minister a duna di conoce.

 

Lamentablemente, Prome Minister a indica, e Landspakket no ta toca demas tema riba e tereno di infrastructura, desaroyo teritorial y medio ambiente. Sinembargo den nos propio Masterplan “Reposicionando rumbo di nos pais” si a pone atencion na e temanan aki. P’esey Gobierno di Aruba a dicidi di alinea e Masterplan y e Landspakket, pa asina nos por traha riba tur area cu mester atencion den recuperacion di nos pais. 

 

“Mi kier enfatisa cu e periodo nos dilanti no ta bay ta facil y sigur lo tin hopi reto, sinembargo cu respet, madures y dedicacion nos lo logra surpasa e retonan aki y transforma nos pais”, Prome Minister a expresa. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: