DEKLARASHON DI AQUALECTRA MIENTRAS TIN INVESTIGASHON ANDANDO NO POR YEGA NA KONKLUSHON PA LOKE TA E KOUSA DI BLEKOUTNAN NI TAMPOKO POR PAPIA DI TUMA MEDIDA DISIPLINARIO

DEKLARASHON DI AQUALECTRA

MIENTRAS TIN INVESTIGASHON ANDANDO NO POR YEGA NA KONKLUSHON PA LOKE TA E KOUSA DI BLEKOUTNAN NI TAMPOKO POR PAPIA DI TUMA MEDIDA DISIPLINARIO

Willemstad- 16 di febrüari 2021- Relashoná ku informe ku a sali publiká den un matutino awe, Aqualectra kier a informá lo siguiente. Pa loke ta trata análisis pa yega na e kousa rais di e blèkoutnan, a entamá dos (2) diferente investigashon pa saka afó kiko ta e kousa. E promé investigashon a wòrdu inisiá dor di gerensia di Aqualectra i e otro a wòrdu inisiá dor di hunta di komisario riba enkargo di Minister di Desaroyo Ekonómiko. Resultado di e investigashon ku Aqualectra a realisá rònt di e blèkoutnan ku a tuma lugá na fin di aña pasá i na komienso di e aña aki a finalisá i a duna e resultado ya konosí.  E investigashon ku ta keda realisá riba enkargo di Hunta di Komisario ainda no a finalisá. Pa e motibu aki gerensia ta enfatisá ku te na momentu ku e investigashonnan terminá no por asumí sierto konklushonnan, ni tampoko yega asina leu pa konkluí ku mester apliká medida disiplinario.  

Aqualectra, a base di informashon ku e tin te ainda ta refutá e informashon ku e blèkoutnan tabata kousá pa sabotahe. Aqualectra lo tene komunidat informá dado kaso tin mas informe ku ta na su lugá pa informá komunidat di dje.