Mester separá kabritu for di karné: Suzy Römer si a kumpli

Kòrsou, 15 februari 2021

 

Título: Mester separá kabritu for di karné: Suzy Römer si a kumpli

 

Na Kòrsou ora un gobièrnu nobo sinta, den un di e promé reunionnan di parlamento e ta duna un presentashon di e Akuerdo di Gobernashon. Lastimamente ora un periodo di gobernashon yega su fin, gobièrnunan di turno no sa duna kuenta i rason na pueblo. Na visperá di e elekshon di 19 mart, PIN ta mira atras riba un trabou sobresaliente di sra. Camelia-Römer durante tres aña i mèi. 

 

Base di e maneho ku a ser hibá riba tereno di SMN durante gran parti di e periodo di gobernashon, ta den en promé frase di kapítulo 6 di e Akuerdo di Gobernashon: “Un aserkamentu aktivo kaminda e konsepto amplio di bienestar “wellness” ta dirigí riba kalidat di e bida humano dor di optimalisá e salú físiko i mental komo prioridat…” (pag. 30). E minister di SMN a sa di ranka sali tempran ku programa pa konsientisá i informá komunidat riba bienestar general. E programanan “Kunukito di Kas i di Bario” lo bai den historia komo un di e tiki akshonnan konkreto den kuadro di Urgentieprogramma pa stimulá patronchi di alimentashon salú. Ku e programa ei a atendé ku problemanan di sobrepeso, malesa di suku, problema ku kurason, kolèsteröl haltu, etc. Den e kuadro aki e finalisá un sírkulo di alimento (voedselschijf) ku ta sirbi pa informá pueblo riba alimentashon balansá. E programa a ser amplia pa skol i na diferente institutonan, manera kasnan di grandi i institutonan pa tratamentu di problemanan mental. Kunukito di Kas i di Bario a haña rekonosementu di organisashonnan internashonal manera WHO i PAHO. 

 

E programa di “Wellness” a keda akompañá pa un seri di programanan kòrtiku na radio emisoranan, televishon i video riba media sosial, pa konsientisá pueblo riba varios aspekto manera higiena, medioambiente, molester di zonido, salú mental. 

 

Parti di e aserkamentu di salú integral tabata e base ku a pone pa aseptashon di Medisina Tradishonal, Alternativo i Komplementario. Den e kuadro aki a sostene formashon di algun wellness coaches sertifiká i tambe pone e base pa mas konosementu di nos mata i yerbanan ku proporshonnan benefisioso pa nos salú. Plannan pa a establesé e prome sentro di wellness den Colon a ser trahá i traspasá pa e susesor di sra. Camelia-Römer. Lastimamente no a sigi ku un investigashon den e kuadro di nos yerbanan i no establesé e promé wellness center, despues ku e minister a retirá. 

 

E programmanan di wellness a ser finansiá pa SVB. Den bon koperashon ku SVB a finansiá un kantidat di programanan den area di wellness pa apenas 0.3% (m.o.m. 2 mion) di e gastunan di SVB pa malesa, ku ta alrededor di f. 600,000,000 (seishen mion florin) pa aña. 

 

Mester hasi menshon tambe di e logro di mas grandi durante e ultimo 4 añan tras di lomba, ku ta nos hospital nobo CMC. Despues ku konstrukshon tabata praktikamente morto na momentu ku sra. Camelia-Römer a asumí posishon, sra. Camelia-Römer di un forma determiná a pone un tim baké pa manehá i supervisá e proyekto. A identifiká tur e fayonan ku a tuma lugá den e periodo anterior i buska un solushon lokal pa e 200 mion ku tabata falta pa sòru pa tur personal di Sehos haña preparashon pa por a pasa pa CMC i tambe finalisá e konstrukshon. Dio’ a para den ku e hospital a keda kla na tempu pa asina Kòrsou por a dil debidamente ora Covid-19 a presentá. Tambe a tuma desishon pa konstrukshon di un edifisio nobo pa ADC banda di CMC. Pa motibu di Covid-19 e inisio di konstrukshon a haña retraso.

 

Mientrastantu e lista di espera i planifikashon di kapasidat tambe a haña atenshon: A aprobá e raport “Capaciteitsplanning Gezondheidszorg Curaçao 2018- 2019”, ku a ampliá e norma pa kantidat di dokter i speshalistanan ku por atmití na Kòrsou. Esaki den kuadro di atendé ku e problema di listanan di espera. Ku esaki a remplasá ‘Santu Remedi’.

 

E Taskforce Marktordening en Financiering Zorgsector a keda instalá ku e meta pa trese reforma den gastunan di salú. Basá riba estudionan di e Task Force, a tuma medidanan pa baha gastu den saluridat ku sigur 80 mion sin tin nodi di subi prima di seguro básiko pa salú (BVZ). Resultado di esaki por nota den e Landspakket pa Kòrsou, kaminda ta rekonosé implísitamente ku riba tereno di SMN si a kumpli. Prueba di koperashon den Reino sin mester mishi ku outoridat di e paisnan ta tambe e hecho ku a start ku servisio hospitalario na pashèntnan di Aruba, Sint Maarten i tambe Bonairu, Saba i Sint Eustatius i firmá un Akuerdo ku Aruba, St. Maarten i BES i Ulanda pa interkambio den spesialismo.

 

Otro logronan importante di sra. Camelia-Römer ta den area di agrikultura, krio di bestia i peska. Basá riba un plan di maneho ku Konseho di Minister a aprobá, a rediseña e Fondo Rotativo Agrario, desaroyá un kuríkulo pa siña hobennan e arte di peska, amplia e kantidat di kunukeronan kompetente pa medio di kursonan riba tereno di agrikultura orgániko, agroforestria i hidroponia. E minister a bai laga un dekreto general atras pa introdukshon di un tarifa speshal di awa pa agrikultura ku mester ser firmá pa e minister di Desaoroyo Ekonómiko. Meskos ta konta pa un proposishon pa protekshon di mas fruta i berdura ku ta ser produsí lokal. Ya por mira fruta di e aserkamentu aki dor di un oumento supstanshal di e sektor agropekuario komo parti di Produkto Nashonal Bruto. 

 

Riba tereno di medioambiente i protekshon di naturalesa tambe sra. Camelia-Ròmer a move basta tera. A instalá un ekipo multidisiplinario bou di e nòmber X-Team pa mantenshon di leinan kontra di molester i di dumpmentu di shushi illegal. E ekipo a hasi hopi kontròl i amonestá esnan ku a hasi nan mes kulpabel na tiramentu di shushi illegal. 

 

Tambe sra. Camelia-Römer den koperashon ku RdK a laga hasi investigashon riba normanan nobo ku mester konta pa kalidat di aire den area di refineria. Basá riba esaki a yega na normanan internashonal Oropeo ku mester konta pa kualke industria ku forma molèster dor di ekspulshon di gas i otro elementonan ku por ta dañino pa salú di hende. E normanan aki a keda aprobá i públika.

 

Hunt ku Waitt Institute a start ehekushon di un maneho di oseano, ku e meta pa protehá nos rekursonan den laman grandi. A hiba tambe konsulta pa dekretá zonanan pa protekshon di peska (stimulá akumulashon di piská) i den koperashon ku inisiativa partikular a pone buinan na hopi sitio na Kòrsou. Huntu ku CTB a determiná normanan pa kuida i tene nos playanan limpi. A stipulá normanan di kondukta pa esnan ku ta bishitá playanan i entamá un trayekto nobo pa atendé ku permit pa esnan ku ta duna servisio di rekreo i benta di kuminda na playanan.

 

Sra. Camelia-Römer a laga traha dos relato di tur su trabounan durante su periodo komo minister di SMN. Riba www.pincuracao.com por download e relatonan aki. Ta trata di mas ku 130 logro importante pa desaroyo di salu, medioambiente I naturalesa. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: