Ta bon pa rekordá pueblo riba mi prestashon komo Parlamentario “Ku kua midí ta midi funshonamentu di Parlamentu?”

Ta bon pa rekordá pueblo riba mi prestashon komo Parlamentario

“Ku kua midí ta midi funshonamentu di Parlamentu?”

Willemstad – Parlamentario Calmes ta kuestioná akusashonnan fuerte di parti di Presidente di Staten (sra. Ana Maria Pauletta). Sra. Pauletta a bin ta indiká pa algun dia kaba ku oposishon, den su mes palabranan ‘’e grupito’’, ta stankando funshonamentu di Parlamento. Tambe sra. Pauletta ta enfatisá ku esaki tin komo konsekuensha ku pais no tin un maneho aktual i ku sierto leinan importante, manera por ehèmpel e Lei di Bestia, no por wòrdu tratá den Parlamento.

Calmes ta splika ku ta importante pa refreská pueblo su mente i pa rekordá pueblo riba e echo ku ta pa motibu di partido PAR mes Parlamento ta goza di un minoria aktualmente. “Esaki ta konsekuensha di nan mes akto i problemanan interno, ku por sierto a pone algún di nan miembro kore limpi bai, i awor nan ta tratando pa tira esaki riba oposishon pa asina nan por sigui goberná manera nan ta haña ta bon. Presidente di Staten mester stòp di hunga víktima i rekonosé e realidat”.  

Calmes ta sigui bisa ku ta importante pa rekordá pueblo tambe riba e echo ku sra. Pauletta no a honra Calmes su petishon pa tene un reunion públiko pa ku un posibel operador nobo pa Refeneria. “Aktualmente tin jen tata di famia na kas a konsekuensha di e echo ku no a haña un operador nobo pa Refeneria, a kaso esaki no a wòrdu konsiderá un prioridat e tempu ei?”, Calmes ta puntra.

Calmes ta lamentá ku Presidente di Staten ta trata na mancha su nòmber i prestashon komo parlamentario, no opstante e echo ku sifra i estadístikanan di Parlamento mes, ku por obtené a través di www.parlamento.cw, ku ta konfirmá ku Calmes a atendé reunionnan di Parlamento debidamente. Tambe Calmes ta e parlamentario ku mas tantu a hasi uso di su ‘vraagrecht’ durante reunionnan di Parlamento. Banda di esaki Calmes a traha riba 15 proposishon di Lei, bou di kuá e Lei ku ta prohibí Gobièrnu di bende propiedat di pueblo sin konsultá promé ku Parlamento. Tambe e Lei pa ku ‘Kiesreglement’ ku ta pone ku esun ku pueblo a depositá su konfiansa den dje ta drenta Parlamento, no opstante ki number e tin riba un lista polítiko. Tambe Calmes a bini ku 3 proposishon pa pais. Ta prohibí pa lubidá e echo ku Calmes a introdusí e promé Lei na Papiamentu.  Tambe Calmes tin hopi kontakto ku diferente bario aki na Kòrsou. “Ta importante pa para ketu na e echosnan aki en bes di bai tira ku lodo inesesariamente. Een kat in het nauw maakt rare sprongen”, sigun Calmes.

Al final Calmes ta indiká ku e ta lamentá ku Presidente di Staten ta aktuando komo un miembro di un frakshon en kuanto oposishon en bes di aktua komo un Presidente di Staten imparsial ku mester para habri pa puntonan i tambe petishonnan pa reunion di parti tantu koalishon komo oposishon. 

“Aworaki na mi pareser ta mas efisiente pa enfoká riba ‘lopende zaken’ i laga e Gobièrnu nobo tuma rienda despues di elekshon”, Calmes ta splika.