Partido Democraat a hasi un bishita di kortesia na gerensia di Kámara di Komersio i Industria Kòrsou

Partido Democraat a hasi un bishita di kortesia na gerensia di Kámara di Komersio i Industria Kòrsou

Partido Democraat ta mira Kámara di Komersio komo un partner klave pa dialogá riba idea i pensamentunan riba e área di nos ekonomia.

 

Durante un bishita ku lider di Partido Democraat Elsa Rozendal huntu ku dos kandidatonan sr. Haitham Metry i sr. Tercy Ignatia a hasi na gerensia di Kámara di Komersio, e dos partidonan por a sera konosí ku otro. Diferente tópiko a bin dilanti i a amplia un poko mas riba e pensamentu di Kámara di Komersio pa ku entre otro eksportashon di servisio i diversifikashon di nos ekonomia. 

Partido Democraat a mustra riba e punto ku den e último dékadanan e ekonomia di Kòrsou a distansiá su mes for di e ekonomia mundial ku e konsekuensia ku Kòrsou su ekonomia a kai hopi atras i práktikamente no a registrá un kresementu den e último 30 añanan. Durante e periodo aki nos a laga e bentaha ekonómiko ku Kòrsou tabatin i hopi otro oportunidatnan klave bai pèrdí. Bo por bisa ku dor di e stankamentu ekonómiko aki Kòrsou no por a logra yega e nivel di un ekonomia mundial.

Pa superá e retraso aki, Kòrsou mester kuminsá integrá su mes bèk den e ekonomia mundial. Komo un pais chikitu sin materia prima i ku un merkado chikí Kòrsou a demonstrá den pasado ku e por tin floresementu grandi den su ekonomia dor di ofrese servisionan. Den e kaso aki bo por pensa riba nos turismo ku promé ku Covid-19 tabata kresiendo fabulosamente. Ta yùist akinan nos mester yega bèk; ofresé servisionan riba nivel internashonal di kalidat haltu i superior.

Partido Democraat ta mira Kámara di Komersio di Kòrsou komo un partner klave pa dialogá riba idea i pensamentunan riba e área di nos ekonomia. 

 

Pa Partido Democraat, traha den estrecho kolaborashon ku partnernan sosial i empresarial ta sumamente importante.