Pa Partido inovashon Nashonal (PIN) polítikeria barata ta pasa Kòrsou un biaha mas den un berguensa konstitushonal total.

 

 

Willemstad, 23 di febrüari 2021

 

Pa Partido inovashon Nashonal (PIN) polítikeria barata ta pasa Kòrsou un biaha mas den un berguensa konstitushonal total.

 

Pa PIN ta un berguensa ku oposishon ta keda sin forma kuorum pa atendé kredensialnan di un miembro di parlamento eligí pa pueblo di Kòrsou.  Por konstatá ku oposishon a hasi formamentu di kuorum pa aprobashon di kredensialnan den parlamento un arma polítiko. Ta duna pueblo un bòfta den su kara pasó su voto no tin balor pa e partidonan aki.

 

Riba dje, ta un di dos berguensa ku kabinete Ruggenaath ta buska solushon serka Reino (lesa Hulanda) pa por pasa e kredensialnan i a la bes algun lei relashoná ku rekorte den salario di mandatarionan; normalisashon di kondishonnan di salario den entidatnan di gobièrnu; i VVU pa amptenarnan. No mester ekskluí ku e Parlamento aktual  por potenshalmente hañé ta trata un lei ku e kabinete aki só, riba su mes, a kumbiní ku Ulanda pa entregá gran parti di nos outonomia, esta e lei di ‘konsenso’ di COHO, ku a keda skondí pa pueblo di Kòrsou te ku dia di awe. 

 

Solushon

PIN ta di opinion ku transparensha i honestidat di ambos banda mester ta base pa e solushon. Ta pesei PIN ta di opinion ku mester ta posibel pa koalishon i oposishon negoshá un lista transparente (públiko) i limitá e leinan ku lo subi agènda di Staten. Nos ta sugerí pa pone den konsulta algun tema di oposishon i di koalishon, lagando naturalmente espasio pa reunion riba kalamidat. 

 

Si esaki no logra, Kabinete òf e miembro entrante di parlamento por bai korte i pidi pa un sentensia pa atmití e miembro den parlamento i asina krea espasio pa Korte di Hustisia disidí di forma imparsial.

 

Ku apenas 3 siman i algu pa un elekshon, e anunsio di Kabinete Rhuggenaath di bai pidi intervenshon serka Hulanda ta un peliger pa nos demokrasia parlamentario. Sigur si ainda no a agotá tur e rekursonan ku nos sistema parlamentario i hudisial ta brinda. Pregunta ta si sr. Rhuggenaath a manda un proposishon konkreto i un agènda konkreto di leinan pa ser tratá pa tur partidonan ku representashon den Staten. No por t’asina ku ta yama un partido so di oposishon pa papia, pa despues yega na e konklushon ku ta kore bai pidi Hulanda pa intervení. 

 

Menos k’un luna falta pa e gobièrnu aki bira demisionario,  anto e ta preferá pa pasa nos den un berguensa asina’ki na lugá di baha? Retiro di e kabinete ta preferibel na luga di laga Hulanda intervení den nos asuntunan. PIN ta purba di mira e lógika di e manera aki di kana, pero no por hañ’e. 

Algun luna pasa nos tabata bringa Hulanda pa kita un instrukshon finansiero for di riba mesa i haña rason te na Raad van State. Awor ta nos mes ta bai bèk serka e mesun sekretario di estado Ulandes, esta sr. Knops, pa ayudo pa solushoná un asuntu di kuorum ku no mester tabata problema niun ora so. Kon ta posibel? Ta e poder ei nos ke dun’e?

 

PIN ta úrgi koalishon i oposishon pa no desperdisiá nos outonomia i sera un akuerdo ku otro ta kua leinan i temanan lo trata den parlamento, pa asina solushoná nos problemanan nos mes! 

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: