Minister Croes ta reuní i dialogá ku represenantenan di Farandula

Minister Croes ta reuní i dialogá ku represenantenan di Farandula

WILLEMSTAD – E sektor farandulero ta un di e sektornan ku a keda mas perhudiká durante di e pandemia di Corona Vírùs ku nos pais ta pasando aden. Pa e motibu aki Minister Steven Croes a tene un seshon durante fin di siman kaminda a dialogá ku vários persona ku ta den e situashon difisil aki. Minister a keda asesorá pa Sra. Stella van Rijn kende ta e Sekretario – General di Ministerio di Asuntunan General ku alabes ta representá e tim di Krisis/Kalamidat, sra. Lisette Sambo-Velder Direktor di Sektor di Kultura i Deporte, sra Magda Rafael i sr Finchi Statia ku ta kolaboradónan di su kabinete. Durante di e seshon huntu ku representantenan a yega na palabrashonnan konkreto pa ku e sektor farandulero.

Durante e seshon Minister Croes a spliká ku e ta komprondé  loke e sektor di farandula ta pasando aden i huntu ku e Sektor di Kultura i Deporte i e tim di Krisis/Kalamidat ke yega na proposishonnan konkreto huntu ku e representantenan pa kuminsa habri farandula. Minister a hasi un petishon na tur esnan presente pa bin ku proposishon pa posibel aktividatnan kaminda por habri farandula bèk di un forma ku ta kuadra ku e medidanan ku Gobièrnu ta implementá. Sra. Van Rijn a splika kon e situashon ta aktualmente i a pidi e sektor pa bini ku alternativanan kaminda nos lo por bai habri e sektor bèk paulatinamente. E aktividatnan lo keda ehekutá komo ‘pilots’ den e temporada binidero.

E representantenan a trese vários punto ku ta di gran balor i a yega na palabrashonnan konkreto. For di e grupo di representante nan a skohe un persona pa bira e persona di kontakto ku ta sigui dialogá ku e timnan. Tambe a keda palabra ku e grupo di representantenan ta bin ku proposishon pa aktividatnan i maneranan kon pa habri e sektor aki bèk. Na mes momentu e representantenan a proponé na Minister Croes pa bin ku insentivanan fiskal kaminda ta trese posibel eksonerashon pa e e negoshantenan di e sektor farandulero. Tambe nan a bin ku un proposishon na Minister pa Gobièrnu bin ku un kampaña mas agresivo pa poblashon hasiendo uso di ‘influencers’ nan di e sektor. Asina por stimulá e komunidat pa bakuná komo ku esaki por yuda e sektor habri bèk mas fasil. Paso na momentu 70% di nos pais bakuná nos por yega na e imunidat kolektivo. Di e forma aki nos por kuminsá tin nos konsierto, komedia, aktividat nan kultural i demas mas pronto posibel. 

Minister Croes a sostené tur dos petishon i palabra ku djarason awor mes lo e trese esakinan dilanti den Konseho di Minister. E reunion a kana di un forma  organisá i tur hende a sali bèk kontentu i satisfecho. Na final di e reunión tur hende a bati man pa e mandatario pa e forma ku ela demostrá di ta kompronde nan situashon i ta buskando solushon. Minister Croes tambe a keda sumamente satisfecho i a indiká ku e lo sigui kana riba e trayekto aki pa yega na un solushon mas pronto ku ta posibel. Ta e intenshon pa reuní bèk dia 13 mart of promé pa yega na aktividatnan konkreto ku por tuma lugá pronto.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: