Proyekto digitalisashon den enseñansa ta bai start: Minister Steven Croes sí ta kumpli.

 

Proyekto digitalisashon den enseñansa ta bai start: Minister Steven Croes sí ta kumpli.

 

Willemstad,- Minister Enseñansa, Siensia, Kultura i Deporte, Steven Croes, a logra regla e fondonan nesesario i pa mas tardá otro siman ta bai firma akuerdonan ku diferente organisashon pa por fin start ku fase 1 di e proyekto Digitalisashon den enseñansa.

 

Manera ta konosí, sigur pa direktivanan di skol, e proyekto di ‘digitalisashon den enseñansa’ ta wantá pa basta tempu simpelmente pa falta di fondo. E proyekto aki ta den preparashon for di aña 2013, pero sin ku e fondonan nesesario tabata realmente disponibel ounke ku nan tabata pone  presupuesto di gobièrnu. Na aña 2019 Ministerio di Enseñansa, Siensia, Kultura i Deporte a reservá fondonan riba presupuesto di 2020 pa e proyekto aki por start. Sinembargo e krisis finansiero na mart 2020 pa motibu di COVID-19 a pone ku e fondonan aki no tabata disponibel mas. For di momentu ku Minister Croes a asumí su funshon komo minister, ela pone digitalisashon komo un di su prioridatnan. Pesei for di desèmber 2020, di un forma diligente, sin papia muchu den publisidat,  Minister Steven Croes a hasi un apelashon fuerte riba su kolega di finansas i huntu a logra lòs e sèn ku tabatin mester pa sierto preparashon ku tabata falta pa por kuminsá ku fase 1 i awor ela logra e fondonan nesesario ku tin mester pa 2021. E proyekto total ta partí den diferente fase. Fasi 1 ta enserá mas òf ménos 3.7 mion florin, di kual mas òf ménos 1 mion florin ta trata gastunan pa un solo biaha pa drecha IT-infrastruktura na tur skol, inkluyendo internet high speed via fiber i training pa maestronan, implementashon di Microsoft Office 365, un ‘digital ecosystem’, un ‘Centraal Landelijk Onderwijs Administratiesysteem’, un ‘leerlingvolgsysteem’ pa skolnan públiko i direktivanan di skol mas chikí i tambe ekspertonan èkstra pa yuda ehekutá e proyekto. Banda di esei fase 1 ta enserá gastunan anual di mas of menos 2.7 mion florin pa uso di Microsoft 365, Internet i un Datacenter. Den fase 1 e intenshon ta pa skolnan por bai funshoná mas ‘smart’, ku un internet/Wifi fuerte ku por usa pa duna lès di un forma digital. Fase 2 ta trata kompra di devices, software i medionan pa siña, miéntras fase 3 i 4 ta trata e mantenshon di e invershonnan hasí. Total ta trata di un suma di mas óf menos 20 mion florin repartí riba alrededor di 4 aña.

Pa loke ta trata fase 1, na jüni/jüli 2020 tabatin un destaho, den kual e dos kompania ku tin na Kòrsou ku ofresé internet i IT-infrastrukra lokual, a partisipá, esta UTS/FLOW i Digicel. A base di e kriterionan stipulá huntu ku vèlt di enseñansa den un TOR, Digicel a skor mihó i a gana e destaho. E kriterionan tabata e.o. speed, preis, kalidat i teknologia riba kual Digicel a skor mihó.

 

Relashoná ku e otro fasenan aktualmente e mandatario ta den deliberashon ku Hulanda pa averiguá posibilidat pa kombiná digitalisashon di enseñansa ku e proyekto di modernisashon di skolnan pa asina garantisá un mihó sinkronisashon i fondonan pa futuro.

This site uses Akismet to reduce spam. Learn how your comment data is processed.

error: Content is protected !!
%d bloggers like this: