Dia mundial di konsientisashon relashoná ku defekto di nasementu 

 

Dia mundial di konsientisashon relashoná ku defekto di nasementu 

Willemstad Defekto di nasementu ta un tema hopi delikado. Ku e meta pa krea mas  konsientisashon i akshon, PAHO/ WHO i otro organisashonnan mundial di salú ta konmemorá  di dia mundial di defekto di nasementu 3 di mart. Defekto di nasementu, defekto kongenital, òf mal formashon kongenital ta e di dos kousa di morto di mucha bou di 28 dia  i menor di 5 aña den nos kontinente i tambe kousa di desabilidat pa restu di un persona su bida. 

E konmemorashon di e dia aki ta pa krea konsiensia riba e tema tan delikado i tòg frekuente aki. Pero tambe pa desaroyá i implementá programanan dirigí pa prevení esaki kaminda ta posibel. Defektonan di nasementu por tin orígen genétiko, infeksioso (por ehèmpel Zika) òf ambiental aunke ku e mayoria di e kasonan ta difísil pa identifiká nan kousa.  

 

Fetal Alcohol Syndrome, un defekto di nasementu prevenibel

Fetal Alcohol Syndrome ta un syndrome (un grupo di problema di salú) ku por surgi serka personanan ku nan mama a konsumí alkohòl durante embaraso. E problemanan di salú aki ta serio, entre otro: problema físiko, problema ku komportashon i problema ku siñamentu. Mayoria bes un persona ku FAS tin un kombinashon di e  problemanan aki i lamentablemente e problemanan ta keda hinter e persona su bida. Esaki ta ehèmpel di defekto di nasementu ku ta sumamente prevenibel. 

 

Otro defektonan di nasementu grave ta mal formashon kardiako, defekto di e tubo neural i Down Sindrome. Na Kòrsou tur aña tin beibi resien nasí ta muri durante e promé 28 dianan di bida debí na un òf otro defekto di nasementu. Despues di komplikashon di un parto prematuro, òf relashoná ku infekshonnan neonatal ku ta vinkulá ku e parto. Pa e beibinan ku sobrebibí i ta biba ku e kondishonnan aki, defektonan di nasementu ta oumentá e riesgo di desabilidat, kual tin impakto grandi pa e persona mes pa restu su bida, su famianan, sistema di salú i komunidat kompleto.

 

Por prevení i trata sierto defekto di nasementu. 

  • Bebe suplemento di folic acid (ásido fóliko i yodium) promé i durante di embaraso.
  • Bakunashon kontra di sarampi aleman na tur mucha muhé ku por transmití esaki na su yu durante parto. 
  • I kuido prenatal adekuá ta algun medida klave di prevenshon, manera no bebe alkohòl i no huma.

Ministerio di GMN su vishon  ta pa kada beibi ku nase na Kòrsou, tin un bida mas saludabel posibel i ku e potensial pa biba un bida pleno i produktivo. Pa e persona ku un defekto di nasementu, e ambishon ta pa mas tantu posibel mehorá e kalidat di bida di persona aki. 

This site uses Akismet to reduce spam. Learn how your comment data is processed.

error: Content is protected !!
%d bloggers like this: