Gobernadó a huramentá Emmilou Capriles komo Parlamentario
Gobernadó a huramentá Emmilou Capriles komo Parlamentario
Willemstad – Dia 4 di mart 2021 lo keda grabá komo un dia úniko den historia di nos pais Kòrsou komo pais outónomo den Reino. A base di e alto instrukshon di gobièrnu di Reino, gobernadó di Kòrsou a huramentá señora Emmilou Capriles komo Parlamentario pa Partido Alternativa Real.
E motibu di esaki ta ku despues di mas ku dies diferente intento ku a wòrdu hasí, dor di presidente di Parlamento di Kòrsou, pa por a forma kuorum pa trata e kredensialnan di señora Capriles den un reunion públiko. Ta konosí ku tur partidonan den oposishon a ninga di presentá. No opstante esaki, Promé Minister señor Eugene Rhuggenaath, a splika ku si tabata nesesario e lo a akudí na Reino den kuadro di su tarea pa salbaguardiá derechinan fundamental di tur siudadano i bon gobernmashon. oposishon a obligá gobernadó pa den un forma eksepshonal i desidido, di akudí na gobièrnu di Reino, pa pidi alto sosten pa asina aktivá Parlamento bèk, pa medio di e huramentashon úniko aki di señora Capriles.
E aña ku ta tras di lomba, gabinete Rhuggenaath a hañ’é konfrontá ku diferente desafio. Nos krísis finansiero, futuro di refineria di Kòrsou i sigur e pandemia i e aktual proseso di bakunashon pa ku Covid-19.
Ku e huramentashon di señora Capriles, Parlamento di Kòrsou ta wòrdu aktivá pa asina por trata e diferente leinan ku tin karakter di urgensia. Ta trata di entre otro e lei di urgensia pa ku e finansiamentu di e situashon di krísis aktual i tambe e situashon di emergensia aktual.
Partido PAR i Parlamentario señora Emmilou Capriles, ke gradisí Kòrsou i Reino Ulandes, pa nan aporte i komprenshon pa ku e proseso demokrátiko ku mester a kana pa yega awe na e huramentashon dor di gobernadó. Muestra ku nos demokrasia ta un di e fundeshinan riba kua partido PAR ta desidido pa sigui kana i guia Kòrsou, a base di seriedat, sinseridat, eksperensia i stabilidat.
Malvina Cecilia
Sekretario
Partido Alternativa Real
