Na opinion di Giovanni Atalita GOBIERNU MESTER TIN MUCHU MAS MIHO ATENSHON PA KUIDO DI HENDE GRANDI NA KÒRSOU

 

Na opinion di Giovanni Atalita

GOBIERNU MESTER TIN MUCHU MAS MIHO ATENSHON PA KUIDO DI HENDE GRANDI NA KÒRSOU

WILLEMSTAD – Kuido di hende grandi ta un elemento importante den desaroyo di un pais. Banda di Enseñansa, Kas, Salubridat i trabou, Kuido di hende grandi mester ta un haltu den bandera di kualkier Gobièrnu na mundu i sigur aki na Kòrsou.

Sinembargo pa e último añanan ku a pasa, Gobièrnunan di turno a pusha kuido di hende for di nan core business i a laga esakinan den man di  organisashonnan partikular, kaminda no semper ta garantisá e kuido di e hende grandi aki na un manera drechi i desente.

Por a tuma nota kon  kas nan kuido di hende grandi a bin ta lanta un tras di otro i e promé kos ku nan ta hasi na momentu ku un hende grandi keda registrá serka un dje kasnan di kuido aki, ta ku e AOV o kualkier otro penshun ku e hende grandi aki tin, lo mester bai riba kuenta di banko dje kas di kuido. Ku otro palabra, tur entrada ku e grandi aki lo tin komo penshonado mester bai pa e kas di kuido.

Poko dia ei a yega na nos konosementu, un situashon ku a hala nos atenshon, kaminda na un kas di kuido básikamente tabata duna e grandinan aki remedi pa nan drumi hinter dia, loke segun e famia no ta normal, pasombra na momentu ku manda un hende di edat pa un kas di grandi, ta pa e haña kuido, pa e por pasa oranan alegre ku otro kompañero ter na momentu ku Dios manda yam’é.

Kualkier Gobièrnu desente mester por tin guia i maneho sigur mirá for di e parti sosial, di kasnan di grandi. Meskos ku e ta sosodé den otro paisnan grandi, e momentu a yega pa Gobièrnu di Kòrsou atraves di su servisionan sosial, bini ku kas nan propio kas di  kuido, kaminda por garantisá e suidadano di edat, un bida mas plasentero, kaminda e lo por sigui disfrutá di su penshun i hasi kosnan alegre yenando su dia.

Ta importante pa den e próksimo Gobernashon ku Partisipashon di Kòrsou di nos Tur, para ketu na esaki i den e tempu di mas korto, presentá un plan kaminda di bèrdat Gobièrnu ta asumí su responsabilidat pa ku loke ta trata kuido di nos hende grandinan.

This site uses Akismet to reduce spam. Learn how your comment data is processed.

error: Content is protected !!
%d bloggers like this: