Digitalisashon di Enseñansa Minister Croes ta firma akuerdo pa halsa kalidat di infrastuktura digital di tur skol subsidiá pa Gobiernu

Digitalisashon di Enseñansa

Minister Croes ta firma akuerdo pa halsa kalidat di infrastuktura digital di tur skol subsidiá pa Gobiernu

WILLEMSTAD – Desaroyo i infrastuktura digital ta di importansha pa un nashon su desaroyo duradero speshalmente den e área di enseñansa. Pa e motibu aki na nòmber di gobièrnu di Kòrsou, Minister di Enseñansa, Siensia, Kultura i Deporte (ESKD), sr. Steven Croes, a firma un akuerdo ku Digicel Business Solutions pa e proyekto di digitalisashon di enseñansa promé parti. E proseso di digitalisashon ta pa konektá tur skol riba un infrastruktura optimal, pone internet i aktivá un servisio sentral di informashon i data di manera ku ta halsa kalidat di infrastuktura digital inkluyendo suministro di internet pa tur skol subisiá pa gobiernu. 

Gobièrnu a instituí un team di trabou ku ta enkarga ku ehekushon di e programa di digitalisashon di sektor di enseñansa pa Kòrsou.  E plan di digitalisashon ta keda ehekutá den diferente fase i e promé parti aki ta pa pone un infrastuktura optimal i stabil na tur e 118 skolnan subsidiá pa gobièrnu di Kòrsou. Pa loke ta trata e promé fase, konforme e prosedura di ‘good corporate governance’, e tim a traha un Terms Of Reference (TOR) i a tene un destaho, den kual e dos kompania ku tin na Kòrsou ku ta ofresé internet i IT-infrastruktura lokal a partisipá.  A base di e kriterionan stipulá huntu ku vèlt di enseñansa den e TOR, Digicel Business a skor mihó i a gana e destaho. E kriterionan tabata e.o. speed, preis, kalidat i teknologia . E kompania di Digicel Business a keda skohé komo esun mihó pa huntu ku Ministerio di ESKD digitalisá Enseñansa. Digicel ta bai hasi entrega di tablet/devicenan na diferente skolnan. 

E proyekto aki ta kanando konforme e Plan Nashonal di desaroyo pa pais (NDP) i tambe konforme e maneho duradero pa ku infrastrukura i konosementu di e filosofia ‘Smart Nation Development’. E struktura di e proyekto aki ta keda ehekutá kaminda Informashon i Teknologia di Komunikashon (ICT)  ta bira e base den e proseso di digitalisahon. Pesei a skohe un modelo moderno kaminda ta traha konforme 4 pilar importante (building blocks) pa e desaroyo duradero di enseñansa pa ku digitalisashon. E pilarnan ta konsistí di Vishon, Ekspertisio, Kontenido/Aplikashon i Infrastruktura.  Esaki nan tur ta e base pa por kuminsá ehekutá e proyekto aki den skolnan. E kuater pilarnan aki ta importante i mester keda desaroyá konforme avansenan moderno pa por tin un implementashon eksitoso den e infrastruktura di ICT pa tur e fasilidatnan na e skolnan.

Huntu ku e trayekto aki ta bai tin mas trayekto paresido den e dianan ku ta bin. Minister Steven Croes ta firma mas akuerdo pa ku e trayekto di digitalisashon. Areanan di enseñansa ku tambe ta haña atenshon, den esaki ta e sistema di administrashon di alumno (Leerlingvolgsysteem/LVS) i tambe ku mira pa den futuro digitalisá Enseñansa Liber Kòrsou (ELK).

Tur esakinan ta trayektonan ku ta kuadro ku e programa di gobernashon 2017-2021 i ta keda ehekutá pa adelanto di nos Enseñansa. Minister Steven Croes ta sumamente satisfecho ku e logro aki pa e desaroyo duradero di Enseñansa.

**riba e fotonan athunto por tum nota di e momentu ku Minister S. Croes i direktor di Digicel sr. R.van der Hoeven ta firma e akuerdo den kompania di e team di Digicel i i direktor di Sektor di Enseñansa i Siensia Sr. W.Kleinmoedig i e team di Gobièrnu.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: