Alivio pa tur famia ku ta paga hür! Proposishon di lei realistiko pa alivio fiskal pa famianan den kas di hür.

 

Alivio pa tur famia ku ta paga hür!

Proposishon di lei realistiko pa alivio fiskal pa famianan den kas di hür.

 

Willemstad — Partido PIN tin un proposishon di lei kla ku lo duna alivio fiskal na famianan di entrada abou i entrada moderá. Ku esaki famianan por gosa di un benefisio semehante na e dedukshon ku doñonan di kas sí tin pa años kaba. E inisiativa di PIN, redaktá pa su kandidato number 4 Kenneth Martis, lo duna famianan trahadó mas sèn den saku tur luna. Un alivio nesesario den e periodo aki di COVID ku a trese desempleo i redukshon di salario pa hopi kas di famia.

 

Motivashon

Riba proposishon di PIN, na desèmber 2018 durante tratamentu di presupuesto 2019, parlamento ku eksepshon di sr. Rojer di frakshon di Kòrsou di Nos Tur, a asepta un moshon ku a pidi e minister di SOAW pa hasi preparashon pa na 2020 introdusí un sistema di supsidio di hür aplikabel pa kasnan ku no ta di FKP. E moshon a pone aksento riba e kasnan habitá pa famianan di un mayor ku yu menor di edat i/òf famianan di entrada mas abou. E minister, sr. Koeiman no a hasi nada ku e moshon ei na bienestar di esnan mas vulnerabel den nos komunidat.

Sinembargo Kenneth Martis i Partido PIN no a para ketu. Konforme página 16 di PIN su programa di akshon, a sigui traha riba un proposishon di lei ku ta baha hür pe gruponan menshoná via di un alivio fiskal basá riba un parti dje gastunan di hür. A traha un modelo den kua ta duna e trahadó un alivio pa (1) e ‘borg’, (2) un seguro di pertinensia (inboedelverzekering) i (3) e parti di hür ku ta mas ku 30% dje entrada neto dje trahadó te na un límite aseptabel segun merkado di kas i segun entrada dje persona.

Asina ki esun ku ta hür ta haña un trato mas igual na esnan ku si por akumulá kapital kumprando un kas. E trato aki ta hustu paso ya pa años gobièrnu no tin un maneho ku ta garantisá disponibilidat di sufisiente kas pagabel.

Pa ilustrá e benefisio den sifra konkreto, tur hende por bai e website PINCURACAO.COM/ALIVIO, hinka datonan di entrada i hür anto kalkulá e benefisio mensual mínimo a base di un famia ku 1 entrada. Riba mes sitio di internet por tuma nota tambe di teksto dje proposishon kompañá pa su nota di splikashon inkluso su responsabilisashon finansiero.

 

Siguiente paso

PIN komo partido humanista-kristian ta kere den libertat di kada persona, anto sufisiente forsa di kompra ta indikashon práktiko di libertat. Pesei PIN ta proponé e alivio realístiko aki dirigí riba duna mas espasio, mas trankilidat i mas libertat na spesífikamente e kasnan di famianan trahadó, pero vulnerabel.

Pa demonstra seriedat dje proposishon, PIN i Kenneth Martis lo entrega e proposishon tantu na parlamento komo na e minister di asuntunan fiskal, ku e petishon fuerte pa diskutí esaki di forma aselerá.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: