Partido Democraat ta hasi un bishitá serka direktiva di SEFBA

Partido Democraat ta hasi un bishitá serka direktiva di SEFBA

 

No dal e stap mas fasil pa hasi trabou di bario pa bario, pero dal esun stap mas difisil i hasi trabou KU bario! 

 

Fundashon pa Stimulá Edukashon i Formashon den Bario (SEFBA) ta un organisashon ku, pa medio di fasilidatnan aksesibel ta pèrkurá pa aktividatnan dirigí riba informashon, edukashon, kapasitashon i formashon di mucha, hóben, adulto i organisashonnan di habitantenan den barionan di Kòrsou. E fundashon ta ofresé programanan di formashon i edukashon pa medio di nos Sentronan di Bario rònt Kòrsou.

 

E bishita ku Partido Democraat a hasi den fin di siman tabata pa pone su mes na altura di e tareanan di e fundashon i tambe pa interkambiá riba ideanan kon pa optimalisá uso di nos Sentronan di Bario.

Un di e promé puntonan ku a bini dilanti ta ku mester bin un mihó kolaborashon entre direktivanan di Sentro di Bario, SEFBA i tambe Gobièrnu. E mester ta un kolaborashon entre e tres nan aki. Gobièrnu mester delineá struktura i un maneho integral ku ta benefisiá e habitante den bario i pa hasi e Sentronan di Bario atraktivo atrobe. 

Partido Democraat ta di opinion ku mester hasi uso optimal di Sentronan di Bario pa no ofresé solamente rekreo, sino hasi e Sentro di Bario un lugá multifunshonal pa sigui lès i kurso pero tambe ku diferente instansia di forma ambulante por yega mas serka di e komunidat. 

Por pensa aki por ehèmpel riba representantenan di SVB, FKP i SOAW (Trahadó Sosial) i Wijkagent pa bini huntu un bia pa siman. 

 

Partido Democraat ta kere ku te asta por bini ku e sistema aki den forma di “Sentro di Bario na Warda”, meskos ku tin “Botika na Warda”. Ban hasi mas ku digitalisashon i hasi uso di kòmpiuter den un area sentral pa komuniká ku instansianan òf sigui kursonan.

 

Na tur e tabata un bishita fruktífero kaminda Partido Democraat a haña un bon bista riba e mishon i tareanan di e organisashon.