Minister di Cultura Xiomara Maduro tabata presente na e evento ‘Poeta di Patria’

Minister di Cultura Xiomara Maduro tabata presente na e evento ‘Poeta di Patria’

ORANJESTAD – Recientemente, den Cas di Cultura, a tuma lugar e evento ‘Poeta di Patria caminda cu poetanan a declama poemanan na nos Pais. Esaki tabata e di 8 biaha cu ta organisa e evento aki cual ta relaciona cu celebracion di nos Dia di Himno y Bandera. Un total di 14 poeta a declama poemanan expresando nan amor y sintimento pa nos patria stima. 

 

E anochi a wordo habri pa Sra. Suzy Maduro kende tabata e MC di e anochi aki. Sr. Atan Lee a hiba palabra como e fundador di e evento aki, sigui pa minister di Cultura, Sra. Xiomara Maduro cu a duna un bunita discurso elogiando esnan participando y gradiciendo nan pa carga Aruba su cultura atraves di nan poemanan. E competencia tabata uno fuerte, di nivel halto y sigur tur 14 participante a sa di dedica bunita palabranan na nos dushi isla cu a laga nos tur mas namora di nos pais. Na tercer lugar a keda Sergio Winterdal cu e poema titula ‘Mi Sanger’ cu a tabata un inspiracion di e indjannan di temponan aya. Na segundo lugar a keda Sr. Jhon Freddy Montoya cu su poema ‘Mas di Mil Motibo’, un poema cu a expresa tur e motibonan cu ta haci Aruba asina maraviyoso. Y por ultimo, e prome lugar y ganador di ‘Poeta di Patria’ di 2021 a keda den persona di Sr. Frank Croes, cu e poema ‘Nos Lenga’ cual tabata un creacion di nos idioma pa comunica cu otro. 

 

Minister Sra. Xiomara Maduro kier a gradici Comision Celebracion Dianan Nacional, Departamento di Cultura Aruba y e comision di Poeta di Patria 2021 pa a organisa un biaha mas e tremendo evento aki y tambe e cuerpo di hurado cu tabata tin un tarea dificil pa saca e finalistanan y ganador. Un danki special na tur esnan cu a participa  y cu a  demostra nan amor pa nos Pais pa medio di nan inspiracion.