Deporte na Kòrsou mester di un drai di 180 grado!

 

Deporte na Kòrsou mester di un drai di 180 grado!

Kanando riba parkenan i vèltnan di deporte den diferente bario nos a tuma nota  ku Gobièrnu aktual no tin deporte na pechu. Hopi tereno di deporte ta parse mas un lèntfel i lugá pa stashoná outo na lugá di ta un area pa praktiká deporte. Esaki ta duna un bista mahos na nos barionan, ta baha balor di nos barionan i ta deskurashá hoben i adulto pa praktiká deporte tantu rekreativo komo kompetitivo.

Sala Di Deporte Errol Hooi na Sentro Deportivo Kòrsou ta nos úniko sala di deporte ku ta kumpli ku normanan internashonal pa weganan di entre otro vòlibòl, basketbòl, futbòl di sala i deporte di arte marsial (p.e. karate). Ku hopi tristesa nos a tuma nota kon atras e mantenshon di e sala aki a bai. Pa dia mas ku 200 alumno di skol i mas ku 50 miembro di diferente deporte di sala (basketbòl, volibòl, futbòl di sala, turnen i badminton) ta hasi uso di e sala aki. Aparentemente Gobièrnu a lubidá riba tur e ramonan di deporte di sala i e alumnonan aki?

 

Partido PIN tin un plan ideal kon invertí i duna deporte general e atenshon nesesario i ku deporte meresé.  Manera PIN drenta den gobièrnu nos lo pasa e lei di Canabis Medisinal pa nos krea e industria di Canabis Medisinal i lo destiná

10% di e ingreso di impuesto di Canabis Medisinal pa invertí den deporte. Aruba ya a pasa e lei di Canabis Medisinal luna pasá.

No por ta asina ku ta 3 area di deporte na Kòrsou so ta haña atenshon. Nos mester inbertí den mihó infrastruktura pa deporte na skol i den bario. Deporte di sala tambe tin derechi di eksistensia, derechi di tin mas ku un sala adekuá i bon mantené pa pratiká na nivel rekreativo i kompetitivo konstantemente, pues 12 luna pa aña.

Deporte na Kòrsou mester di un drai di 180 grado! Deporte tambe mester ta Dotá!