Elsa Rozendal, lider Partido Democraat ku un tim di profeshonal Preokupashon: Di trabounan ku entrada haltu pa esnan ku pago abou

 

Elsa Rozendal, lider Partido Democraat ku un tim di profeshonal

Preokupashon: Di trabounan ku entrada haltu pa esnan ku pago abou

 

WILLEMSTAD – Stagnashon ekonómiko na Kòrsou den e último añanan pa gran parti ta debí na un maneho di gobièrnu ku ta laga hopi di deseá. Un ekonomia poko inovativo i sin kolaborashon produktivo ku partnernan sosial a kousa mas atraso. Na opinion di Partido Democraat, ta remarkabel ku gobièrnu ta mete ku demasiado asuntu anto pa kolmo no ta atendé e asuntunan aki manera mester ta. Esaki ta e motibu pa kiko Partido Democraat ta presentá su lider polítiko Elsa Rozendal huntu ku un tim di profeshonal. Kòrsou ta na un krusada masha fèrfelu, kaminda tin mester di hendenan ku konosementu i mas ku tur kos hendenan íntegro pa traha pa e pueblo aki.

Den e último dieskuater aña, esta promé ku COVID-19, por a nota un skuifmentu hopi bisto di trabounan ku ta brinda un entrada haltu pa trabounan ku ta brinda un pago mas abou. Esaki ta un tendensia hopi preokupante. Den un ekonomia ku ta strukturalmente débil e nesesidat pa un mihó seguridat sosial a bira mas importante, loke ta pone ku e gastunan di seguridat sosial ta sigui oumentá, ekonomia ta sigui bai atras i konsekuentemente e situashon ta sigui empeorá. P’esei Partido Democraat tin un tim, e tim formá  pa Elsa Rozendal ku ta rondoná i sostené pa 20 kandidato mas. Pues ta bon pa bo sa ku ora bo vota Partido Democraat bo no a benta bo voto afó!

Na lugá di fasilitá, e gobièrnunan di turno den último añanan a hala mas tarea den nan direkshon i tin sufisiente prueba ku hopi di e tareanan, ku gobièrnunan a tuma pa nan kumpli kuné, sektor privá lo a hasié mihó i mas efisiente. Resultado di esaki ta un gobièrnu ku a ekspandé – ku di mes ta burokrátiko i – ku mas i mas tin influensia negativo riba ekonomia su kresementu i desaroyo. Pa e motibu aki desempleo ta subi i e nesesidatnan sosial ta bira mas grandi. E ta un sirkulo visioso ku ta birando pió dia pa dia.

E parti di gobièrnu den trafikashon ekonómiko ku ta konsistí di e aktornan privá, kompanianan, gobièrnu i eksterior ta muchu grandi. E parti di gobièrnu den e bolo ekonómiko ta balotá na por lo ménos 40% (inkluso Kompanianan Privá i fundashonnan di gobièrnu). Esaki mester kambia! Ménos intervenshon di gobièrnu i alabes krea un klima den kua ta fasilitá mas inovashon i mas aktividat por reina. E delaster aspekto aki por kondusí na generá mas entrada pa gobièrnu i ménos gastu for di kaha di gobièrnu. P’esei Partido Democraat ta reakshoná ku determinashon i firmesa pa hasi e gobièrnu burokrátiko mas chikí i efisiente dor di entre otro realisá digitalisashon i mas transparensia. 

Gobièrnu netamente mester fasilitá i stimulá ekonomia di forma desidido, krea un klima di invershon sufisiente atraktivo (pa medio di e.o. lei i insentivo di siglo 21) i no stroba desaroyo ekonómiko dor di regulashonnan i funshonamentu burokrátiko. Lo invertí e kosecha i entradanan di ekonomia den maneho di desaroyo sosial efisiente pa e siudadanonan di Kòrsou. Ta esei ta konta: nan desaroyo, bienestar i felisidat. Inisiativa i desaroyonan Públiko -Privá lo stimulá aktividatnan ekonómiko. Ban konstruí e dushi Kòrsou bèk, p’esei dia 19 di mart awor vota Partido Democraat.