Haitham Metry di Partido Democraat ta pidi bankonan komersial miserikordia pa nos pueblo.

 

Haitham Metry di Partido Democraat ta pidi bankonan komersial miserikordia pa nos pueblo.

WILLEMSTAD – Den ápenas un tempu masha kòrtiku Partido Democraat a sá di reorganisá su mes i bolbe fuertemente riba e tarima polítiko.
Día 11 di yanüari e partido a risibí sra. Elsa Rozendal ku mannan habrí komo su lider nobo, i día 18 di yanüari e partido a hasí su otro kantidatonan konosí na komunidat.
Entre e kantidatonan sr. Haitham Metry ta destaká na puesto 6.

Haitham a bin ta mustra di ta un polítiko nobo pero hopi aktivo ku ta move rápido riba varios tereno.
E kantidato number 6 ta kana den varios bario pa skucha nos pueblo i tambe a bin ta sinta ku varios gremio empresarial den nos komunidat pa skucha unda nan sapatu ta pèrta i ta hasi di su parti pa trese un alvio aki sin ku ahinda e ta den Parlamentu.

Algu ku a bin ta yama sr. Metry su atenshon ta ku varios empresario a trese dilanti ku nan no ta logra kumpli ku pago di nan hipotekanan mirando ku e krisisnan aktual (esun ekonómiko ku ya tabata tei promé ku Covid i esún a konsekuenshia di Covid) a dal nan hopi duru.
E empresarionan a duna di konosé ku ya kaba nan a baha nan gastunan te abòu i hasta mester a baha nan kantidat di empleado i tin ku hasta a keda komo e úniko empleado den nan negoshi trahando pro bono pa asina logra tene portanan habrí sperando ku kos lo drecha bék pronto.
Resibunan ta akomulando i ku e tiki entrada ku nan ta hañando nan ta purba paga algu di sierto resibunan pa evitá paro di e servisionan básiko ku nan mester di sierto kompanía.

Aña pasá bankonan komersial a duna algún luna di despansashon kual a yuda en grande ku sobrebibenshia di hopi negoshi i tambe por a evitá di mester a manda empleadonan kas.
Sr. Metry ta aploudí e akto aki di e bankonan i kier yamanan danki.

Lamentablemente e dòbel krisis no a pasa, al kontrario kos ta birando mas difísil.
Mayoría komersiante chikí i mediano no a logra bin na remarke pa NOW regeling i nan buffer ta kabando òf a kaba mientras ku nan ta di buena fé i ke kumpli ku nan obligashonnan pero ya no ta sobrando roséa finansiero i ta premirá ku nan lo no logra sobrebibí e promé mitar di e aña aki.
Varios komersiante ta purbando na yega na un areglo ku nan banko, pero no ta hañando oído di banko pa basta día.

Mirando e situashon di krísis grave ku Kòrsou ta pasando aden sr. Metry ta supliká bankonan komersial lokal pa bolbe pasa man na nan kurason i bolbe bini ku 6 luna tempu di grasia òf sikiera 1 aña di suavisashon kaminda ta kobra e kliente solamente e interés sin multa pa asina yuda aliviá e peso finansiero i tambe yuda mantené e kuponan di trabou. Aki tambe tin empleadonan ku hipotek pa paga ku lo ta mas leu for di kas si nan pèrdè trabou.
Kisas banko por sinta ku su klientenan i yuda nan ku ideanan inovativo kon pa sobrebibí ku loke nan tin.


Haitham Metry ta kere ku ta hopi importante pa evitá ku komersiantenan i pueblo mester aserká instansianan òf personanan den baho mundo pa fíansa i asina hinka nan mes i nos isla den otro problemanan. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: