VISHON: “Kambio di bèrdat ta den man di kada habitante di Kòrsou!”

 

VISHON: “Kambio di bèrdat ta den man di kada habitante di Kòrsou!”

 

Willemstad, 15 di Mart 2021 – Segun Vishonario Jedrek Magdalena, Kòrsou tin e potenshal pa den 5 pa 10 aña krese den e isla ekonómikamente mas lukrativo i sobresalí den varios deporte na nivel profeshonal internashonal. VISHON, den su programa di partido, ta trata e area di formashon kaminda ta aliñá deporte i enseñansa ampliamente. Sin embargo, Magdalena ta boga pa promové kambio di mentalidat den komunidat, pa elevá ekspektativa personal i aspirá pa mihó, en bes di mediokresia.

 

“Ki dia nos komo pueblo ta realisá tur e potenshal ku nos tin? Pa hopi tempu kaba nos ta bisa ku Kòrsou tin hopi potenshal, Kòrsou por logra hopi, nos hendenan tin hopi talento i kon, ounke nos ta chikí, nos ta sobresalí den tur área rònt mundu.”, asina Jedrek Magdalena ta splika. Pero nos no ta aktua i tampoko tuma desishonnan den liña ku e pensamentu i realidat akí. Nos a keda pegá pa añanan largu den mes un sistema di aseptá mediokresia serka tur hende den tur área.

 

Magdalena tin su historial den mundu di deporte, komo presidente di Federashon di Beisbol Kòrsou i den pasado tambe komo deportista ku a sobresalí tantu lokal komo den eksterior. Segun Magdalena nos ta aseptá di nos yunan ku basta nan haña un “voldoende” mes ta sufisiente i ku nos ta laga nos yunan tambe pensa i papia esaki, enbes di mustra nan ku nan por i ku nan meresé mihó. T’e tipo di pensamentunan aki nos ta apliká den nos bida diario. Ku ta pone ku outomátikamente nos ta sigui aseptá i keda satisfecho ku mediokresia riba tur tereno den nos komunidat. 

 

Si nos ke pa Kòrsou yega su potensial máksimo, ta den man di kada siudadano pa kambia nos mentalidat di atendé ku kos, lanta ariba i move. 

 

Nos tin potenshal pa hasi Kòrsou den 5 pa 10 aña e isla mas lukrativo ekonómikamente i sobresalí den varios deporte na nivel profeshonal internashonal. Pa krese den arte i tin artistanan renombrá mundialmente. Nos por hasi Kòrsou e sentro di Karibe den e área marítimo, nos por bira e pais ku ta eksportá mas servisio na nivel finansiero den área di tekonologia i muchu mas.

 

E úniko kos ku nos mester kuminsá hasi ta kambia nos aserkamentu pa atendé ku tur situashon i kuminsá aspirá pa perfekshon na lugá di tolerá mediokresia. 

 

Bo no por keda hasi meskos i spera un resultado diferente! Ban lanta ariba i demostrá ku nos ke kambio di bèrdat. Kòrsou su futuro ta den bo man! Hasi bon uso di dje. 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: