Na 2016 a hunga mesun wega pa konfundí pueblo Partido Democraat ta atvertí komunidat pa enkuestanan manipulativo di PAR atrobe
Na 2016 a hunga mesun wega pa konfundí pueblo
Partido Democraat ta atvertí komunidat pa enkuestanan manipulativo di PAR atrobe
WILLEMSTAD – Partido Democraat a tuma nota di un enkuesta di The University òf the Dutch Caribbean (UDC). Masha notabel ta kon hopi hende den komunidat a komentá mesora ku nan no ta kere den konklushonnan ku e enkuesta aki ta duna. Ta bon pa indiká ku no ta promé bia ku UDC ta protagonista di e tipo di enkuesta aki nèt den porta di elekshon.
Meskos a sosodé na 2016, kaminda e mesun Universidat aki a saka un enkuesta den kua a duna partido MFK kompletamente ganá. Esei a pone ku mesora tur esnan ku tabata kontra di un gobièrnu di MFK a aktiva i bai vota pa PAR i MAN di manera ku e dos partidonan aki a haña mas tantu voto.
Segun oranan a kana, hendenan a tuma nota ku ta UDC ta esun ku a traha e enkuesta i einan a kaba di kita tur kredibilidat di e enkuesta. Partido Democraat ya kaba a konosé e tipo di enkuestanan aki ku no ta representativo y no ta reflekta realidat. Ta Parse ku mas bien ta akshonnan hopi manipulativo ku e meta pa forsa elekshon den sierto direkshon.
Tur hende mes por a tuma nota ku UDC mes ta indiká ku hopi hende no kier a partisipá na e enkuesta, pues un bia mas no por saka konklushon serio ni konfiabel for di e enkuesta aki.
Partido Democraat ta lamentá e tipo di maniobra aki i p’esei e tolda korá mes ta hasi su propio enkuesta durante kanamentu den barionan i den enkuentronan ku gruponan den nos komunidat.
Partido Democraat ta satisfecho ku reakshon di komunidat ku ta indiká ku Partido Democraat ta bon pa 2 pa 3 asiento den e elekshon di djabièrnè awor. Pueblo di Korsou por konta ku Partido Democraat.
Chehadi Eddine
