Minister Boekhoudt di GMN ta tuma e preokupashonnan den sektor di kuido na serio: un solushon finansieramente responsabel mester keda e punto di salida!

KOMUNIKADO DI PRENSA
Publiká 30 di òktober 2026

Minister di Salubridat, Medio Ambiente i Naturalesa, señor Tyron Boekhoudt, a tuma nota di e deklarashonnan resien di algun institushon di kuido den medionan di komunikashon tokante e situashon finansiero den e sektor. E minister ta rekonosé e preokupashonnan aki i ta apresiá e esfuerso di e trahadónan den e sektor, ku tur dia ta kuida personanan vulnerabel.

Minister Boekhoudt ta komprondé e preokupashonnan di e sektor di kuido, pero ke klarifiká ku e fondo di fluktuashon (schommelfonds) ya ta bou di preshon struktural, entre otro pa motibu di e oumento di e pago di AOV na Cg 1.000 pa luna ku entrante 1 di yanüari 2026, i pasobra e gastunan di kuido di salú ya a surpasá un límite akseptabel. Si mester kumpli kompletamente ku e petishonnan aktual di e sektor di kuido den 2026, esaki lo nifiká un suma konsiderabel di kasi Cg 18 mion ku lo mester paga un biaha so, tambe un gastu struktural di mas ku Cg 6 mion ku ta bolbe tur aña. Esaki lo pone e fondo di fluktuashon den un situashon negativo di forma duradero, ku riesgonan pa e posibilidat di sigui finansiá kuido di salú pa tur habitante di Kòrsou riba término largu.

Minister Boekhoudt ta rekonosé tambe e nesesidat di mehorashonnan struktural den e sektor, prinsipalmente den e kondishonnan laboral. Tokante esaki, ya a hasi palabrashonnan pa Banko di Seguro Sosial (SVB) realisá un investigashon di e kondishonnan laboral di personal di kuido di salú den henter pais. Relashoná ku esaki, na e momentu aki Autoridat Reguladó di Kòrsou (RAC) ta realisando tambe un “kostprijsonderzoek”.

Tur dos investigashon lo ta kla na kuminsamentu di 2027 i lo forma un base ophetivo pa e desishonnan nesesario tokante tarifanan, kondishonnan laboral i presupuestonan di kuido di salú. A palabrá ku e medidanan aki i otro medidanan lo wordu inkluí den un akuerdo ku e ministerio i e institushonnan di kuido a prepará huntu.

Minister Boekhoudt ta konsiente ku e sektor no ke warda riba e investigashonnan aki i ku el a pidi un supsidio transitorio pa kubri e periodo te ora e resultadonan ta konosí. Sinembargo, no por duna un kompromiso pa kumpli ku e petishon aki sin un kobertura finansiero sólido i struktural.
Un kompromiso pa un pago di un biaha so, sin kobertura finansiero, lo no solushoná e problema, sino solamente posponé, pasobra sin reforma struktural di e manera ku ta finansiá kuido di salú, por spera un défisit similar pa e aña ku ta bini tambe.

P’esei, Minister Boekhoudt ta trahando pa krea espasio finansiero struktural pa término largu, di manera ku por duna eventual sosten finansiero na e sektor di un forma sostenibel. Apesar di e deskontentu den e sektor, Minister Boekhoudt ta sigui den diálogo ku e representantenan di e nuebe institushonnan den e sektor di kuido i lo sigui vigilá di serka e progreso di e programa di reforma i e investigashonnan ku ta andando.