Partido Demokrat ke mihó maneho di salubridat pa área lubidá BANDABOU MESTER HAÑA UN BOTIKA MOBIL I MAS DÒKTER NA WARDA
Partido Demokrat ke mihó maneho di salubridat pa área lubidá
BANDABOU MESTER HAÑA UN BOTIKA MOBIL I MAS DÒKTER NA WARDA
WILLEMSTAD – E pueblo di Bándabou mester haña por lo ménos un botika mobil ku lo duna servisio tantu na e habitantenan ku a oumentá konsiderabelmente, komo e turistanan ku hopi biaha no por imaginá nan mes ku no tin e servisio ei.
Ademas di un botika, ta hopi urgente pa introdusí mas dòkter na warda pa Bándabou, ku den vários okashon ta laga hopi di deseá. Ta difisil pa haña un dòkter na warda i esaki ta kousa basta riesgo den kasonan di emergensia.
Segun Carvienka Brandao-Vapor number ocho (8) di Partido Democraat, e botika mobil ta nesesario pa sirbi regionnan kaminda no tin otro alternativa i pa yuda e habitante ku no tin transporte pa bai botika mas pariba.
“Hopi biaha e habitante di Bándabou mester stèns riba yudansa di hende ku por kore bai Bándariba pa buska remedi i ta haña nan alivio lat, loke por trese konsekuensianan fèrfelu i inesesario,” segun Brandao-Vapor ta splika.
E botika mobil por ehèmpel lo kore di Krakeel bai Westpunt, parando na sierto pòstnan kaminda tin hopi pasashi di hende manera Dokterstuin, Leliënberg i Shete Boka, pa despues sigui via di Lagun, Soto, Pannekoek, San Juan, Colonia i Fontein bèk pa Krakeel.
Adelantá ta publiká un lista di fecha i ora ku e botika mobil ta pasa i duna servisio. “E hendenan di Bándabou lo keda hopi kontentu, ku porfin nan no mester molestiá hende i ku nan mes por yega e botika i tuma remedi,” e kandidato di Partido Democraat a bisa.
Segun Brandao-Vapor,e botika mobil aki ta e solushon mas rápido riba término kòrtiku, komo ku lo ta difisil pa traha botika tur kaminda. “Pero e idea aki lo sirbi tur hende tòg den un tiru, inkluso e turista ku mester di un botika,” asina el a agregá.
“Hopi biaha e habitante di Bándabou mester di un simpel Paracetamol òf kualke otro remedi simpel, pero no por kumpra esaki na un toko. Pa no papia mes di remedinan mas kompliká,” el a aklará otro motibu pa un botika mobil.
Segun e krachi hóben di Bándabou, e botika mobil aki lo por ofresé e servisio di laboratorio tambe, ku den boka di pueblo ta konosí komo kue sanguer. “Otro problema ta e skarsedat di dòkter, pero prinsipalmente esun na warda,” e flamante polítiko a bisa.
“Ta dikon ta lubidá riba e pueblo di Bándabou? Ta dikon no tin un dòkter na warda konfiabel? Asina Partido Democraat drenta gobièrnu, lo mi bin ku e solushon di un dòkter na warda. Loke ta pasando awor aki, no por,” el a insistí.
“P’esei mi ta pidi pueblo di Bándabou e sosten dia 19 di Mart awor. Ku e habitantenan su voto, lo por drecha kos pa nan i pèrkurá pa nan tambe haña e mesun atenshon ku sobra di Kòrsou tin,” el a sigurá fuertemente.
